Xune Elipe firma una carta de compromisos llingüísticos pa la llexislatura nueva

|
Xune Elipe y candidates de Podemos actu central de campaña

El númberu 2 de la llista de Podemos garra "la responsabilidá de llevar alantre toles acciones precises pa que se llogre un tratamientu amañosu de la cuestión llingüística".

"Un momentu crucial p'Asturies", califica Xune Elipe les eleiciones del 28-M, qu'esta selmana firmó una carta de compromisos llingüísticos de cara a la llexislatura nueva, onde "la capacidá d'influencia que tengan les fuercies progresistes y el sentíu asturianista qu'éstes muestres van ser fundamentales p'acolumbrar l'horizonte de llibertá y respetu llingüísticu pol que munches persones llevamos naguando dende hai décades". El primer puntu de los 11 qu'inclúi'l documentu afita la so firmeza a "impulsar dende'l primer momentu la reforma del Estatutu d'Autonomía, esplorando toles fórmules aplicables, onde se recueya la oficialidá de les llingües propies (asturianu y gallego-asturianu) ensin escepcionalidaes nin nengún tipu de mengua d'estatus".

La creación d'un Institutu Asturianu de les Industries Culturales, l'aprobación del conveniu-marcu que regule l'usu de los idiomes del país na RTPA, la recuperación del plan pilotu pa la so introducción como llingües vehiculares na educación, la creación de la especialidá docente, mayor presupuestu pa la política llingüística y financiación y visibilidá pa l'Academia de la Llingua Asturiana,, estabilidá y mayor espardimientu pa los servicios de normalización llingüística son dalgunes de les otres cuestiones a les que se compremete Elipe. Tamién a "usar dafechu en toles intervenciones y ámbitos l'asturianu y el gallego-asturianu como ferramienta de normalización y visibilización del fechu llingüísticu del país" y a destinar parte del escedente xeneráu pol códigu éticu a entidaes en defensa del idioma.

Na semeya, Elipe, ente Laura Tuero y Cova Tomé, candidata de Podemos a la presidencia d'Asturies, ayeri na xixonesa sala Albéniz nel actu central de campaña del partíu.

Contador Estadistiques