Wert: “El bable nun ta reconocíu como llingua cooficial y nun procede la creación como especialidá"

Una carta a la Conseyería d’Educación, Cultura y Deporte fechada’l 8 d’ochobre y firmada pol ministru José Ignacio Wert sentenciaba que “dao que’l bable nun ta reconocíu como llingua cooficial nel Estatutu d’Autonomía del Principáu d’Asturies, nun procede la creación como especialidá de profesoráu d’Educación Primaria y Secundaria”. Ana González insta agora al ministeriu n’otra carta a que-y indique cómo desendolcala dende Asturies.

Ésta tien como destinatariu’l subsecretariu d’Estáu de Educación, Cultura y Deporte, Fernando Benzo, cola fin de que comunique “qué llexislación impide crear la especialidá d’una llingua tradicional como la de nueso que, amás, forma parte del currículu de una comunidad autónoma, al mesmo tiempu que se reconoz les especialidaes d’otres llingües (francés, llatín, portugués, griego…) que nun son oficiales o cooficiales nel Estáu español”. La conseyera tamién reclama que nel casu de que’l Gobiernu estatal asegure que nun ta dientro de les sos competencies el desendolcu de la especialidá, notifique “qué fundamentos de derechu deberíamos tener en cuenta pa qu’una comunidad autónoma como la de nueso pudiese sacar alantre tal reconocimientu nos mesmos términos que’l restu d’especialidaes, yá que, nel casu de qu’esista tal posibilidá, esta comunidá va exercela”.

González prometiera pa esta llexislatura la creación de la especialidá de Llingua Asturiana y Gallego-asturiano, una demanda vieya del asturianismu qu’igualaría la situación de los maestros d’este materies col restu del profesoráu, al tiempu que daría más estabilidá a l’asignatura, pero la falta d’oficialidá torna a ser una torga pese a qu’esta iniciativa cuenta col sofitu de la Xunta Xeneral y de tola comunidá educativa, como amuesa la so inclusión na emnienda del Real Decretu d’Especialidaes de la Educación Secundaria por parte de la Permanente del Conseyu Escolar Estatal.