La Xunta Xeneral reclama la especialidá d’asturianu cola oposición única del PP

|

PSOE, Foro y UPyD aprobaron la proposición non de llei presentada a la Xunta Xeneral por IX cola fin d’encamentar al Gobiernu pa que negocie col Ministeriu d’Educación, Cultura y Deporte la creación de la especialidá d’asturianu. El PP votó en contra, incumpliendo asina’l so programa eleutoral.

La especialidá ye una demanda vieya del asturianismu –que la conseyera d’Educación, Cultura y Deporte Ana González prometiera pa esta llexislatura y que cuenta col preste del Conseyu Escolar Estatal– qu’igualaría a los maestros de Llingua Asturiana y Gallego-asturiano al restu del profesoráu. Emilia Vázquez encargóse de defender n’asturianu nel Parllamentu la propuesta d’Izquierda Xunida (IX), que contó col apoyu de 33 de los 45 diputaos, esto ye, la totalidá de grupos menos el popular. Llama l’atención que precisamente la reconocencia de la especialidá ye ún de los dos puntos qu’incluyía’l PP nel so programa sobre Educación referente al nuesu idioma –l’otru yera la garantía d’ufierta de la materia nos centros–, incumpliendo asina’l so compromisu colos sos eleutores.

Tres conocer el resultáu de la votación, Iniciativa pol Asturianu asoleyó un comunicáu nel que felicita a tolos partíos pol sofitu a la especialidá y nel que carga contra’l PP: “Entrugámonos si Mercedes Fernández piensa cumplir esti programa reclamando al Ministeriu dirixíu pol so partíu esta reconocencia que ta agora nes sos manes o si va siguir tomando decisiones como la d’esta mañana, n’absoluta contradición colo prometío a los sos votantes”, apuntaron dende esti coleutivu.

Contador Estadistiques