Sobrepásase otra vegada la cifra de 3.000 positivos

La tendencia descendente fraya nuna xornada na qu'aumentó'l númberu d'hospitalizaos.

Llueu de cuatru xornaes de descensu, los trés últimos perbaxo de los 3.000 contaxos, Asturies vive un aumentu de casos. Si'l llunes se comunicaron 2.735, ayeri esta cantidá xubió a 3.373.

Nesti día aumentaron les persones hospitalizaes, pasando de 415 a 422, de los que 56 siguen na UCI. En planta hai 366 pacientes, 7 más .

Perdieron la vida cola enfermedá causada pol coronavirus SARS-CoV-2 seis ciudadanos: trés muyeres de 91, 77 y 74, y trés homes de 85, 75 y 72. El total de finaos nel andanciu queda en 2.230.

Na semeya, toma de muestra esti mes a una moza nel puntu móvil pa facer test d'antíxenos instaláu en Xixón, nel barriu de La Calzada.