Sigue la fuelga indefinida a pesiar de los acuerdos col 'Comité Nacional del Transporte'

|
Furgoneta de repartu pel centru de Xixón

La UE acepta dar un tratamientu especial a la Península no que cinca a la intervención de la enerxía.

Les midíes van a presentase’l martes nel Conseyu de Ministros.

Na madrugada del vienres la ministra Raquel Sánchez y el Comité Nacional del Transporte por Carretera (CNTC) llegaben a un acuerdu pa rebaxar del preciu del carburante 20 céntimos por llitru y p’aplicar los principios de la llei de la cadena alimentaria hasta’l 30 de xunu. Amás, les ayudes van ser pol tipu de vehículu, van ampliase los plazos de los créitos ICO hasta diez años, y les devoluciones del gasóleu profesional van facese de manera mensual, en vez de trimestral como hasta agora. El presupuestu va ser 1.125 millones d’euros.

Sicasí, la Plataforma Nacional por la Defensa del Transporte por Carretera -qu’apoyen Asintra, Cesintra, Casintra y Asetra- nun participó nes negociaciones por tar fuera del CNTC y convocó’l vienres una concentración énte’l Ministeriu de Tresporte na que tamién participaron cuasi un millar d’asturianos.

La Plataforma, que representa a autónomos y pymes, considera que son midíes insuficientes porque nun garanticen que nun haya pérdides económiques. Pela tarde, la ministra aconceyaba con esti colectivu que reclamaba que “se puea denunciar al cargador que pague por debaxo de costos ensin entrar en demandes” allargaes nel tiempu. La rempuesta foi que pa eso, habría d’esperar “dos o tres meses” hasta qu’entre en vigor la nueva llei.

Bruxeles da vía llibre a España y Portugal

Pela so parte, el presidente del Gobiernu, Pedro Sánchez, intervenía nel Conseyu Européu pa pidir, xunto a Portugal, un “tratamientu especial” pa poder parar el preciu de la enerxía, dixebrando’l preciu del gas de la elletricidá. Tres del parabién de Bruxeles, va ser el prósimu martes día 29 cola cellebración del Conseyu de Ministros, cuando van implantase les midíes no que cinca a la enerxía dientro del Plan Nacional para combatir los efectos de la guerra en Ucrania.

La selmana pasada la ministra de Transición Ecolóxica, Teresa Ribera, anunció una baxada de los precios dempués d’esponer a les empreses elléctriques que si baxaben los precios diba ser “un xestu mui apreciáu” y nun quixo impone-yos más impuestos.

L’asociación de consumidores FACUA defiende, pel so llau, la intervención del mercáu y atacar el marxe de beneficios, que l’añu pasáu “foi de 10.000 milllones d’euros” pa les seis grandes empreses del sector. La propuesta de la asociación, y que’l Gobiernu nun quier asumir, ye baxar el preciu tope a 50 euros por megawatio hora -que ta agora en 3.000 euros-. Y amás, imponer un impuestu especial a les enerxétiques pa que les empreses pequeñes que tuvieren pérdides puean recuperase más alantre.

Contador Estadistiques