¿Qué ye'l mandatu-marcu de la RTPA? 10 claves pa entender la so importancia

La Xunta Xeneral ta trabayando na ellaboración del testu que va conformar esti documentu. Pero, ¿qué importancia tien pa la presencia del asturianu? Esplicámostelo nesta información.

¿Qué ye’l mandatu-marcu?

Ye un documentu qu'afita los oxetivos xenerales del ente públicu de comunicación que nun tien validez práutica, anque sí simbólica: ye una declaración d’intenciones sobre'l papel, los oxetivos y les prioridaes del ente públicu.

¿De quién depende?

Failu’l Parllamentu, con una validez de 9 años.

¿Ye lo mesmo que'l contratu-programa?

Non, el contratu-programa ye un desarrollu del mandatu-marcu, ye más concretu y con una financiación pa 3 años, y cuenta con validez práutica. Pue afitar hores d’emisiones, porcentaxes o xéneros qu’incluyir na programación.

¿Quién establez el contratu-programa?

Sal d’una negociación ente’l Gobiernu y la direición xeneral del ente de comunicación.

¿Qué diz la llei asturiana?

La Llei de RTPA, na reestructuración del 2014, marca que la Xunta Xeneral ha aprobar el mandatu-marcu “nel plazu de seis meses dende la entrada a valir de la llei”. Diez años depués, entovía nun se fixo.

¿Y sobre’l contratu-programa?

Que “los oxetivos aprobaos nel mandatu-marcu serán desarrollaos nel contratu-programa alcordáu pol Conseyu de Gobierno con Radiotelevisión del Principáu d’Asturies (RTPA)”. El conseyeru de Facienda sería’l responsable de tratar esti asuntu cola direición xeneral del ente de comunicación una vegada aprobáu’l mandatu-marcu.

¿Dizse dalgo del asturianu?

Non, la norma sólo fala de “la promoción de la educación y la cultura, particularmente asturiana, con especial proteición del bable/asturianu y del gallego/asturiano, per aciu de la promoción del so usu y difusión” nel artículu 8 ‘Principios de producción y programación’.

¿Ye necesariu'l mandatu-marcu pa la emisión de programes nes llingües propies?

Non, nun fai falta un mandatu-marcu p’asumir el papel normalizador qu’ha xugar la RTPA, magar ser ésta una escusa puesta dende’l momentu de l’aprobación de la Llei na Xunta Xeneral por Antonio Virgili pa nun apostar poles llingües propies, repetida agora pol so sucesor Francisco González Orejas.

¿Ye importante incluyir referencies al asturianu y al gallego-asturiano nel mandatu-marcu?

Anque simbólico, sí, sería importante incluyir que la RTPA ha xugar un papel normalizador, afalar a la creación d’una industria audiovisual y asumir un rol compensatoriu con respeuto al restu de medios de comunicación, que sólo emiten en castellanu.

Nesi sen, nel 2014, con motivu de la redaición de la llei nueva de RTPA, un total de 26 coleutivos de la sociedá asturiana encabezaos pola Xunta pola Defensa de la Llingua Asturiana roblaron un documentu con 5 puntos “irrenunciables” nel que demanden “unos medios públicos al serviciu d’Asturies”, del que saldría posteriormente una propuesta de redaición pa incluyir nel mandatu-marcu.

¿Va meyorar la situación?

Non necesariamente, porque nun garantiza nada. Pero sí ye un primer pasu si se concreta nel contratu-programa, que dependería del Gobiernu, onde sí pue haber obligación d’hores, xéneros o porcentaxes a partir de los oxetivos xenerales afitaos nel mandatu-marcu.