Política Llingüística diz que l’alcuerdu pal usu de la toponimia en La Vuelta ye “de bones intenciones”

La Direición de Política Llingüística señaló que l’alcuerdu anunciáu en xineru con Unipublic pal usu de la toponimia oficial en La Vuelta ye “de bones intenciones”. La ronda ciclista llega esti domingu a Asturies procedente de Lleón.

“L’alcuerdu qu’hai con Unipublic ye de bones intenciones. Nun hai nengún alcuerdu firme”, señalaron dende Política Llingüística tres la consulta fecha por Asturies.com la selmana pasada al respeuto de l’usu de topónimos non oficiales na documentación de La Vuelta y na so páxina web. Según señalaron dende’l gabinete de comunicación de la Conseyería d’Educación, Cultura y Deporte, la direutora xeneral nueva, Ana Fueyo Llaneza, contautó estos díes anteriores con Unipublic pa tratar esti tema, quedando too en bones pallabres. Sicasí, el martes pasáu la web de La Vuelta corrixó’l nome del altu onde va finar el llunes la etapa reina de la ronda ciclista: camudaron ‘Cuitu Negro’, utilizáu dende la presentación del percorríu de la carrera ciclista en xineru, pol oficial ‘Cuitunigru’, anque caltuvieron el nome de llugar ‘Pajares’ en cuenta de ‘Payares’, que sería’l correutu. Esti cambiu nun dexa de ser simbólicu, yá que la documentación a los medios de comunicación yá ta entregada y los nomes que se van ver estos díes nos medios estatales y internacionales nun van ser l’oficial ‘Cuitunigru’.

Pela so parte, Unipublic nun dio de momento respuesta a la consulta realizada por esti diariu dixital. La toponimia asturiana ye la única que nun se respeta nesta edición de La Vuelta, yá que los nomes de llugar utilizaos en territorios vascos, catalanes y gallegos foron los tradicionales y non los castellanizaos. Too ello pese a l’anuncia fecha en xineru pol direutor de Política Llingüística anterior, Alfredo Ignacio Álvarez Menéndez, al traviés d’un comunicáu, del compromisu d’Unipublic d’utilizar la toponimia oficial, esto ye, l’asturiana, nes dos etapes de la ronda que pasaríen per Asturies, asina como n’ediciones próximes. El cambiu de color nel Gobiernu, cola salida de Foro Asturias Ciudadano (FAC) y la entrada del PSOE, podría ser una razón pa esplicar l’escaezu d’esti compromisu.

Asturies, clave nel desenllaz de La Vuelta

Los Llagos d’Enol y La Ercina y el Cuitunigru van ser los dos altos que, con casi toda probabilidá, van decidir esta edición de La Vuelta. Cuatro homes tán con opciones de llegar a Madrid col maillot colloráu de llíder que nestos momentos, cuando ta disputándose la decimotercer etapa ente Santiago de Compostela y Ferrol, caltién Joaquim ‘Purito’ Rodríguez (Katusha): Alberto Contador (Saxo Bank-Tinkoff Bank), a 13 segundos del catalán; Christopher Froome (Sky), a 51 segundos; y Alejandro Valverde (Movistar), a 1 minutu y 20 segundos.

La entrada de la carrera a territoriu asturianu va tener llugar el domingu cola etapa La Robla-Llagos d’Enol y La Ercina, na que la xuba a El Fitu a 40 quilómetros del final va desgastar a los ciclistes antes d’afrontar les rampes d’esti altu míticu pa esti deporte. Mentes, el llunes, va celebrase la etapa reina de La Vuelta, con salida en Xixón y llegada al desconocíu Cuitunigru, onde s’espera un afluencia grande d’aficionaos, al igual que’l domingu en Los Llagos.