Unipublic comprométese a utilizar la toponimia oficial en La Vuelta

La empresa organizadora de La Vuelta comprometióse a la utilización de la toponimia oficial nel so percorríu per Asturies. La Direición Xeneral de Política Llingüística encargóse de tratar esti tema con Unipublic.

Política Llingüística esplica nuna nota que solicitó a La Vuelta qu’utilizara “les denominaciones oficiales que s'establecen nos correspondientes Decretos d'Oficialización Toponímica –hasta la fecha son cuarenta y nueve los conceyos asturianos que lu tienen aprobáu– y nel Mapa Topográficu Oficial d'Asturies, escala 1:200 000, editáu pol Principáu nel 2010". D’igual mou, la direición xeneral “ofreció la so total disposición p'asesorar a Unipublic, la entidá organizadora de la Vuelta Ciclista, nel correctu usu y visibilización de los nomes oficiales de les población y llugares peles que trescurran les etapes asturianes". La collaboración, bien recibida pola organización de la ronda ciclista, quier facese estensiva a esta edición y les socesives.

Esta negociación del Gobiernu d’Asturies ye novedosa nesi sen, porque enxamás se respetara la toponimia tradicional en La Vuelta, a esceición de casos aislaos, como’l de L’Angliru. Tres la presentación de la edición del 2012 de la carrera ciclista, onde s’utilizaben topónimos castellanos non oficiales como Cuitu Negru por Cuitunigru o l’Alto de Ortiguero por Ḥortigueru, la Xunta pola Defensa de la Llingua Asturiana reclamó la intervención de la Xunta Asesora de Toponimia pa iguar la situación. Agora, tres la negociación de Política Llingüística, paez que va normalizase esti asuntu. Sicasí, de momentu, la web de La Vuelta mantién la toponimia castellana nos sos percorríos per Asturies.