Los datos del paru asitien a Asturies como la segunda autonomía con mayor baxada

Namái Illes Balears presenta meyores cifres de desemplegu en términos relativos en febreru. Asturies cuenta cola cifra más baxa de paraos pa esti mes en 16 años, mengua liderara pola construcción y los servicios, y la Seguridá Social, la más alta d’afiliaos dende’l 2010.

Febreru finó n’Asturies con 381 demandantes d’emplegu menos que dexen el total en 58.835, lo que supón un descensu del 0,64 por cientu, siendo la media estatal del 0,27 al contar con 7.452 paraos menos. Los 2.760.408 qu’hai nel conxuntu del Estáu ye la cifra más baxa dende’l 2008 pa esti mes.

Sólo rexistró una meyor mengua qu’Asturies les Illes Balears, con un 1,23 por cientu, mentes qu’Euskadi, y Castiella y Lleón son les siguientes de la llista con un 0,61. Por contra, los peores datos son los Ceuta (un aumentu del 1,65 por cientu), Aragón (1,23) y Navarra (1,22).

En términos interañales, el país acumula 35 meses de baxada consecutives. Nesta ocasión foi del 7,09 por cientu al rexistrar 4.491 menos, cuando la media estatal foi del 5,17, con 150.607.

Illes Balears tamién lidera esta clasificación, con un 12,66 por cientu, siguíu de Canarias (10,27) y Murcia (9,81). L’únicu llugar onde aumentó’l paru d’un añu pa otru ye Melilla, un 2,38 por cientu.

López González prevé que siga la baxada hasta setiembre

La direutora xerente del Serviciu Públicu d’Emplegu, Begoña López González, valoró de manera positiva los datos pa un mes tradicionalmente complicáu como febreru y celebró que se baxara de los 59.000 desemplegaos, hasta rexistrar la cifra más baxa dende’l 2008. “La previsión que tenemos ye siguir con la sienda de descensos nes cifras del paru hasta que fine la campaña de branu, allá pel mes de setiembre”, señaló.

Tamién rescampló los bonos datos d’afiliación a la Seguridá Social, con un aumentu del 0,29 por cientu hasta algamar los 376.399 cotizantes, el rexistru más altu dende’l 2010 pa un mes de febreru, lo que supón 1.086 más. En comparación col mesmu periodu del 2023, rexístrase una medra de 7.735, lo que reflexa un incremento del 2,10 por cientu.

En cuanto a contrataciones, firmáronse 17.195 contratos polos 17.922 del mes anterior, un 4,06 por cientu menos. 6.284 d’ellos, un 36,5 por cientu d’ellos, foron indefiníos.