Asturies rexistra un aumentu del paru en xineru de 1.844 persones

El total de 59.216 desemplegaos supón, sicasí, la cantidá más baxa pa esti mes en 16 años.

Depués de cinco meses de descensu del paru, xineru, como ye habitual pol final de la campaña navidiega, tuvo un aumentu de demandantes d'emplegu. Foron 1.844 más, lo que supón un 3,21 por cientu, percima de la media estatal, del 2,23 por cientu al rexistrar una medra de 60.404 persones que ponen el total en 2.767.860.

Lideres l'ascensu Estremaúra (3,88 por cientu), siguida de Melilla (3,33) y la Comunidad de Madrid (3,26). L'únicu territoriu onde baxó foi n'Illes Balears, un 1,84 por cientu.

En comparanza col mesmu mes del añu pasáu, Asturies rexistró un descensu de 5.013 persones, un 7,80 por cientu. Ye un porcentaxe meyor que la media estatal, del 4,83 por cientu al contar con 140.537 paraos menos, rexistrando los meyores númberos relativos tamién Illes Balears, un 12,45 por cientu.

Mayor afilación a la Seguridá Social dende'l 2010

L'afiliación a la Seguridá Social baxó en xineru n'Asturies en 4.760 trabayadores, pa dexar el total en 375.313. Esta cantidá ye, sicasí, la más alta en 14 años, dende'l 2010, y 7.198 más que va un añu.

No que respeuta a les contrataciones, hebo 17.922 firmes, un 4,9 por cientu más que n'avientu. Con respeuto a xineru del 2023, supón una medría del 4,4 por cientu.