Llan de Cubel y Hevia tamién van tar nel Interceltique de Lorient nel Année des Asturies

José Manuel Tejedor va tocar na presentación en París de la programación del certame bretón xunto con Ronan Le Bars Group.

El Festival Interceltique de Lorient dio a conocer güei, llueu de dos avances, les actuaciones que completen la edición d'esti 2022, Année des Asturies, que se va celebrar del 5 al 14 d'agostu. Llan de Cubel y Hevia, amás de la Banda Gaites Llacín y el Grupo Folklórico Trebeyu, amplíen la nómina d'artistes asturianos n'An Oriant.

Estes formaciones xúnense a Cerezal, L-R, Rodrigo Cuevas y Muga, amás de Silvia Quesada y José Manuel Tejedor, que participen na iniciativa ‘Celtic Odysée’ xunto a músicos d'otres naciones celtes. Tamién va entamase diez años depués la iniciativa Breizh Asturies Project, con Fañch Loric, Nicolas Radin, Leticia Baselgas, la propia Quesada, Mathieu Sérot, Tibo Niobé, Julien Le Mentec y Tudi Cariou, una fusión de fest-noz y nueche en danza.

EP 'Lluz'

José Manuel Tejedor, mentes, va participar mañana a les 20 hores nel parisín Pan Piper, na presentación de la programación del festival na capital francesa. Va compartir escenariu col grupu del bretón Ronan Le Bars.

El gaiteru avilesín ta acabante de llanzar una campaña de micromecenalgu na rede p'asoleyar l'EP 'Lluz'. Esti trabayu, el segundu depués de 'Miraes', ta compuestu por "7 cantares nuevos y collaboraciones especiales" d'Asturies, Éire o Euskadi, y en pocos díes yá recaudó 2.522 euros de los 6.000 necesarios.

La presentación del discu ta prevista pal 14 de mayu n'Avilés, nel Teatru Palacio Valdés.