El Festival Interceltique de Lorient confirma a Rodrigo Cuevas

La organización del certame, que celebra l'Année des Asturies esti 2022, fixo un adelantu de bandes nel que ta tamién Muga.

Rodrigo Cuevas va estrenase nel Festival Interceltique de Lorient el domingu 7 d'agostu. Va actuar en Le Kleub, escenariu nuevu dedicáu a propuestes más modernes con raigañu celta, compartiendo dende les 21.30 hores escenariu colos bretones MOX y un tercer nome por confimar, conciertu que va tener un costu de 16 euros.

D'esta forma'l cantante uvieín amplía la delegación asturiana nel añu dedicáu al país n'An Oriant xunto col tríu asturbretón Muga, confirmáu tamién ayeri, que va actuar el domingu 14 d'agostu a les 14 hores na Quai de la Bretagne. Hasta agora taben anunciaos Cerezal y L-R, amás de Silvia Quesada y José Manuel Tejedor na iniciativa ‘Celtic Odysée’ xunto a artistes d'otres naciones celtes.

Nel avance nuevu del programa pa la cincuentena primer edición del Interceltique dau pola organización tamién apaecen los nomes de Capercaillie, Lúnasa, Caamaño & Ameixeiras o Les Ramoneurs de Menhirs, histórica banda bretona de rock que tocó nel 2009 xunto con Dixebra nel festival.