Les bases d'EH Bildu llamen a zarrar un alcuerdu con "fuercies soberanistes de Asturias"

|
Josu Juaristi

Nel 2014 Andecha Astur foi en coalición colos vascos nes eleiciones al Parllamentu Européu na candidatura Los Pueblos Deciden.

El sábadu celebróse la Batzar Orokorrean d'Euskal Herria Bildu, nel que les bases del partíu decidieron por unanimidá "un mandatu que nos pide zarrar nel menor espaciu de tiempu posible un alcuerdu de coalición con Esquerra y BNG. Pero non sólo con BNG y Esquerra Republicana, tamién coles fuercies soberanistes de Asturias, Aragón y Canarias", esplicó l'europarllamentariu Josu Juaristi, que va repetir como candidatu d'EH Bildu.

La intención de la formación vasca, según el mandáu de les bases, "ye siguir negociando col restu de fuercies soberanistes y republicanes na mesma direición" pa siguir teniendo presencia n'Europa "pa reforciar los llazos coles fuercies progresistes europees, y mui especialmente pa reforciar la cooperación, el trabayu en común, coles naciones ensin estáu".

Formaciones de cinco países

Los Pueblos Deciden foi una coalición liderada por EH Bildu na que participó BNG (Galicia), Puyalón de Cuchas (Aragón), y Unión del Pueblo y Alternativa Nacionalista Canaria (Canarias), amás d'Andecha Astur. Dulce María Gil, col númberu 15 de la candidatura, foi la primera asturiana na llista, con Paulo Arboleya como 24 y Arturu Xosé Bermeyu como 32.

En tol Estáu sumó 326.464 votos (2,08 por cientu), de los que 1.392 llegaron d'Asturies (0,37 por cientu), pa sumar un eurodiputáu. ERC, a la qu'agora pretende sumar EH Bildu, acudió naquella ocasión na coalición Esquerra pel Dret a Decidir –n'Asturies presentóse como Esquerra Republicana-La Esquierda pol Derechu a Decidir-La Izquierda por el Derecho a Decidir– con otres formaciones catalanes, Nova Esquerra Catalana y Catalunya Sí, algamando dos escaños al rexistrar 629 071 votos (4,02 por cientu).

Na semeya, Juaristi nuna intervención nel Parllamentu Européu.

 

Contador Estadistiques