El Tartiere y El Molinón recuperen el consumu de comida y bébora

|
Grada del Carlos Tartiere Nuevu

Los aficionaos azules van ser los primeros en disfrutar del fin d'esta restricción cola visita a Uviéu del Leganés esti domingu.

El Gobiernu espublizó esti vienres nel Boletín Oficial del Principáu d'Asturies (BOPA) les midíes especiales pa eventos deportivos multitudinarios alcordaes pol Conseyu Interterritorial del Sistema Nacional de Salud. Asina, va ser posible consumir comida y bébora nel Carlos Tartiere Nuevu y n'El Molinón un mes depués de recuperar l'aforu completu, asina como la venta de productos nestes instalaciones, nes que fumar va siguir prohibío.

El domingu, a les 18.15 hores, va estrenase esta situación n'Asturies cola celebración del partíu ente l'Uviéu y el Leganés. En Xixón, los aficionaos van vivir esti cambiu nel derbi, programáu pal sábadu 16 a les 20.30 hores.

Hai que recordar que l'usu de la mázcara continúa siendo obligatoriu nos espectáculos deportivos, tanto n'espacios zarraos como abiertos.

Na semeya, grada del Tartiere nel derbi últimu, celebráu n'ochobre.

Contador Estadistiques