El Tartiere nun va tener llende d'aforu pal derbi

El Conseyu Interterritorial del Sistema Nacional de Salud quita los límites n'espacios abiertos dende esta xornada por unanimidá. El martes rexistráronse 15 casos nuevos de COVID-19.

L'Uviéu-Sporting del sábadu 9 d'ochobre (21 hores, Vamos) nun va tener llende d'aforu. Dende esti vienres desapaez el tope máximo n'esteriores, qu'en pabellones s'aumenta al 80 por cientu de capacidá hasta'l final d'ochobre, lo que va permitir que'l derbi asturianu recupere un bon ambiente depués de trés choques a puerta zarrada.

Sicasí, ello nun significa que la entidá azul pueda disponer de les más de 30.000 butaques del so estadiu, yá que los clubes han garantizar una distancia interpersonal de 1,5 metros ente asistentes, anque sí va permitir l'accesu a tolos abonaos y la venta d'entraes a públicu llocal. Queda en dulda la presencia d'afición visitante, que sería, en tou casu, mui llendada, anque sería posible, como amuesa les 200 entraes que l'Amorebieta cede al Sporting pal partíu d'esti sábadu (16 hores, GOL) en Lezama.

Siete díes ensin finaos

A falta de la espublización de los datos oficiales, la Conseyería de Salú informó de la detección de 15 casos nuevos de COVID-19 –l'actualización aumenta la cantidá total en 2, hasta los 70.874, por positivos non contabilizaos nos díes previos–. Son 3 más que'l llunes, cuando se comunicaron 12.

El Serviciu de Salú del Principáu d'Asturies (SESPA) fixo 2.219 pruebes de diagnósticu d'infeición activa, polo que la tasa de positividá s'asitió nel 0,85 por cientu. A 7 díes esti porcentaxe yera enantes de l'actualización del 1,03 por cientu –ayeri xubió al 1,06 por cientu–.

Per séptima xornada nun hebo que llamentar muertes. No que respeuta a los hospitalizaos, 13 persones tán en planta con confirmación o sospecha de COVID-19, 4 menos que'l llunes, a los qu'hai que sumar los 10 pacientes ingresaos na UCI, 1 menos.

Na semeya, el conseyeru de Salú, Pablo Ignacio Fernández Muñiz, na unidá nueva de Salú Bucodental del Centru de Salú Villalegre-La Luz, n'Avilés, onde detalló los alcuerdos del Conseyu Interterritorial d'esta mañana. Ta acompañáu pol coordinador del ambulatoriu, Óscar Fores; la conceyala de Promoción Social, Nuria Delmiro; y el xerente del Área Sanitaria III, Ricardo de Dios.