El 86 por cientu de los llectores d’Asturies ve indispensable’l caltenimientu de l’autopista del mar

Los cuatro años de funcionamientu de l’autopista del mar ente Xixón y Naunnt - Saint-Nazère amosaron la importancia de la llinia p’Asturies. Un 86 por cientu de los usuarios que participaron en ‘Conceyu Abiertu’ vela indispensable.

El 17 de setiembre salió d’El Musel el viaxe caberu del barcu de LD Lines que cubría la ruta subvencionada. La razón que daba la naviera pa dexar de trabayala yera la falta de rentabilidá de la llinia, dalgo que nun terminó de convencer a les autoridaes, que tán tramitando una auditoría "a fin d'averiguar con detalle les razones poles que la sociedá esplotadora desvióse nel so oxetivu inicial de facer vidable'l serviciu, una vegada escosaes les ayudes públique pal so llanzamientu”, según respondió’l Gobiernu estatal al diputáu d’Amaiur Jon Iñarritu tres una consulta nacida d’Andecha Astur. Lo cierto ye que más dos meses depués, l’autopista del mar continúa inactiva, dalgo que’l 86 por cientu de los llectores d’Asturies considera perxudicial p’Asturies. Mentes, un 9 por cientu nun la ve indispensable, por un 5 por cientu qu’escoyó la opción ‘Nun sé’.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usarios sobre la dimisión d’Esther Díaz, conseyera de Bienestar Social y Vivienda, tres salir en prensa la so participación na empresa Davelco, alministrada pol so maríu y subcontratada por axudicataries d’obres públiques.