Díaz dimite como conseyera de Bienestar Social pola so participación na empresa Davelco

|

Nueve díes depués de l’apaición en prensa d'una información sobre la participación d’Esther Díaz en Davelco, empresa alministrada pol so maríu y subcontratada por axudicataries d’obres públiques, la conseyera de Bienestar Social y Vivienda dimite. Anuciólo na mañana del llunes nuna intervención énte la Comisión de Presidencia de la Xunta Xeneral.

“Señoríes, anuncio-yos que presentaré darréu la mio renuncia al presidente del Gobiernu d’Asturies. Renunciaré al mio cargu de conseyera de Bienestar Social y Vivienda nel Gobierno d’Asturies y, con él, al compromisu políticu y la ilusión personal que punxera n’exercelu. Digo alón a too esto con frustración, con dolor y col consuelu únicu de salir cola cabeza alta de la conseyería, y de poder mirar a los güeyos a los mios vecinos, porque, repito, nin soi una corrupta, nin robé, nin utilicé los mios cargos en beneficiu d’empresa dalguna. Nesos charcos atoparán a otros; a min, enxamás”, espresó Díaz na so comparecencia tres esplicar de forma amplia’l so papel en Davelco y la so rellación cola empresa. El diariu ‘El Comercio’ dio a conocer esta situación, incompatible cola Llei del Bon Gobiernu y Tresparencia promulgada pol PSOE y entovía en proyeutu –restrinxe hasta un 10 por cientu los porcentaxes de participación de políticos n’empreses qu’opten a contratos públicos o subvenciones–, el domingu 9 de payares, a lo que la ex alcaldesa de Llangréu respondió con una rueda de prensa na que confirmó que contaba con un 19,8 por cientu de la propiedá de la firma –onde trabayó enantes de principiar cola so carrera política–, calcando en que yera llegal.

A lo llargo de la selmana, delles informaciones apuntaben que Davelco foi una firma subcontratada en delles obres públiques d’importancia, como la construcción del Nuevu Ganzábal, el xeriátrico de Felechosa, l’HUCA, l’ampliación d’El Musel o l’autovía de Riañu a Sama, ente otres. Al respeuto, Díaz defende que “nunca intermedié, presioné nin favorecí a empreses axudicataries de llicitaciones de les alministraciones públiques. Saben qu’eso nun lo puedo probar –d’ehí la perversión de la inversión de la carga de la prueba– pero de lo que toi segura ye que nadie, absolutamente nadie, pue afirmar lo contrario”. Pa zarrar la so intervención, tres sentir los reproches de la oposición, la ex conseyera salió en defensa de Javier Fernández y de la so actuación nesta selmana.

Contador Estadistiques