Mr. Bean, presidente de turnu de la UE

Un grupu d'hackers colocaron na páxina de la presidencia española de turnu de la Unión Europea una imaxe del famosu cómicu inglés, Rowan Atkinson, conocíu pol so personaxe Mr. Bean. Los hackers bloquiaron la páxina y colocaron la imaxe col saludu “Hi there”.

La imaxe de Mr. Bean nel llugar de la de José Luis Rodríguez Zapatero nun tuvo muncho tiempu en llinia, pero abondo pa que la comunidá dixital fixérase ecu y espardiera la imaxe per ayuri. La páxina de la presidencia española de la UE tuvo tola tarde del llunes con problemes d’accesu. Sicasí, según los sos responsables foi pol aumentu del tráficu.
 
Según datos oficiales, el Gobiernu español destina doce millones d’euros a l'asistencia téunica y la seguridá de la web oficial. La páxina ta desendolcada por Informática El Corte Inglés (IECISA), mientres que Telefónica ufre los servicios de telecomunicaciones.