Esther García López y Borja Sauras falen con nosotros del so "Menú de Versos"

La escritora Esther García López y l'ilustrador Borja Sauras presentábennos hai poco l'álbum ilustráu "Menú de Versos" editáu por Pintar-Pintar Comunicación. Con esti pretestu aprovechanos pa entruga-yos pola so vida profesional y la so vinculación cola Lliteratura Infantil y Xuvenil n'Asturianu.
Esther García López ye una escritora perconocida dientro del ámbitu de la lliteratura n'asturianu tanto pola so obra poética como polos sos trabayos de didáctica y manuales de deprendimientu de la llingua asturiana. D'otru llau Borja Sauras, ilustrador mozu que collabora amás como animador pa canales infantiles de televisión, ye tamién responsable del llibru n'asturianu "¿De qué tará fecha la lluna?" de Miguel Rojo.
 
Nesti menú de versos, ¿qué pesa más? ¿Tresmitir el gustu poles bones costumes alimenticies o pola lliteratura con gustu?
 
Esther García - La intención ye principalmente lliteraria. Hai que tener en cuenta que los neños amuesen interés  precisamente poles obres que-yos presten, que-yos permitan disfrutar lleendo. Saben mui bien distinguir cuando un llibru tien galanura lliteraria y tienen dende pequeños preferencia pola belleza de la palabra.  Pero nun hai dulda que qu’amás d’esta finalidá estética, que nesta obra, ta por demás conseguida,   Menú de versos, tien tamién, al empar, una finalidá didáctica. Esti llibru nes manes de los neños, pue  sirvir como sofitu pa  trabayar diversos aspeutos educativos, rellacionaos cola educación en valores, concretamente, educación pa la salú, pa la convivencia, pa la igualdá, etc. p’afitar valores que  van inxertaos  nesta obra, a la qu’aporta   significáu la palabra, pero que nun pue separtase de les ilustraciones, tan prestoses  onde tán cuidaos tolos detalles,  desaniciando estereotipos que puedan influir negativamente na educación del neñu.  Y amás hai que valorar l’aspeutu  estéticu que ta dafechu consiguió. Quedé mui contenta del resultáu.  Un llibru guapísimu.  La galanura, y el gustu pola llectura ye la so propia finalidá y el so aprovechamientu si se quier con fines didáuticos  inxertase  nel so conteníu.
 
Borja Sauras - Yo nun sé si equilibrada, pero seguro qu’imaxinativa y variada. Si-yos entra un poco fame al lleelu yo quedo contentu.
 
Viendo'l vuestru llibru doime cuenta de que na lliteratura infantil y xuvenil hai menos testos poéticos que narrativos ¿pensais que pue haber dalguna causa?
 
E.G. - Sí , asina ye. Quiciabes, crear testos poéticos  pa los neños  seya más difícil qu’escribir un rellatu. Sobre too  escribir testos en versu que-ys mantengan l’atención y que-yos os resulten interesantes. Pero nun podemos escaecer la importancia que la poesía tien n’estes edaes  tempranes; ye’l primer contautu cola lliteratura que tien el neñu; añaes, cantares infantiles, cosadielles, xuegos de palabres…Casique se pue dicir que toles mas, pas y güelos- yos canten a lossos fíos na etapa infantil. Esa lliteratura oral, en versu, ta fomentando nel neñu'l gustu pola lliteratura. Ye’l so primer aniciu lliterariu. El ritmu, la musicalidá de les palabres, tienen un efeutu máxicu hasta nos más pequeños. Los neños amen la poesía y tenemos que pòné-yosla nes sos manes pa que la disfruten. D’eso se trata. Por estes y otres razones, fai muncha  falta crear testos en versu n’asturianu pal públicu infantil, porque hai mui poco.
 
B.S. - Nun sé la razón. A mí cuando yera neñu aburríame. Agora valórolo más; necesítase inxeniu, sensibilidá y sentíu del ritmu pa espresar en rimes. Camiento que los mozos tán entamando a garra-y el gustu cola moda del hip-hop. Nun digo que vayan a ponese a lleer a Juan Ramón Jiménez o a Lorca, pero tán usándolo como mediu d’espresión. Con too pienso que dende siempre la poesía fue dalgo d’unos pocos.
 
Entós cuando yerais neños ¿qué vos prestaba lleer? ¿pue influir a la hora de ponese a escribir o ilustrar?
 
E.G. - Yo cuando yera neña, escuché munchos cuentos, cantares, romances y cosiquines de la boca de mio ma y de mio pa que yera un esperto contador de cuentos. Y como non, de mio güela paterna, que convivió conmigo tola infancia y la mocedá. Ella tenía una gran memoria y cantaba y contaba de manera especial. Creo qu'esto foi la semiente de la mio faceta d’escritora.
Llibros tenía pocos. Namás dalgún cuentu que mio pá me traía cuando diba a la villa y los que lleíamos na escuela:  El Quixote, Lleiciones de coses, Vidas de santos y demás. Eses fueron les mios primeres llectures.
 
B.S. - A mi los llibros gustábenme con poca lletra y munchu dibuxu. Ye una cuenta que tengo pendiente, lo mesmo que lo de comer verdura. A ver si dempués de dibuxar esti llibru tomo exemplu y me pongo a ello (colo de comer verdura digo).
La verdá ye qu’influyéronme más les mios vivencies y l’animación.
 
Supongo que tar dientro del ámbitu de la educación y l’animación  facilita’l conocimientu de les preferencies de la reciella en materia lliteraria, ¿evolucionaron muncho nestos últimos años?
 
E.G. - Asina ye. Dempués de tantos años d’esperiencia profesional como docente, conócense bien  los gustos de los neños, y ye fácil volvese neñu por unos díes y averase al so mundu con un rellatu o un poema. Eso ye lo guapo de ser  maestru, disfrutar de la inxenuidá, la creatividá, y la xenialidá qu’espeyen  na clase los escolinos  a poco que los motives . Los alumnos apórtennos munches coses a los profesores.
 
B.S. - A mí por embargu resúltame difícil dar una opinión sobre esto. Agora hai otros tipos de diversión qu’enantes nun había y creo que los gustos van empobinaos per esti camín, quitando’l protagonismu d’otros d’otres dómines. Tengo bastante contactu con mozos y moces y paezme que vienen unes xeneraciones un poco materialistes y superficiales. Y los neños que vienen detrás deprenden d’ellos queramos o non. Creo que ta na nuestra mano desperta-yos l’interés por otres coses un poco más fondes. Y despertalos en xeneral, porque dame a mi que tán un poco como pigazando.
 
Esther, dientro de la lliteratura n’asturianu tienes tocaos practicamente tolos palos: poesía, cuentu, lliteratura pa neños y neñes ¿hai dalgún xéneru nel que te sientas especialmente cómoda?
 
E.G. - Casique nun sabría dicítelo. Ye dalgo bien distinto. Escribir un poema, hai veces que depende del estáu d’animu, o de dalguna situación suxerente, de sentimientos, de distintes situaciones de la vida. Hai munchos momentos y munches situaciones que m’inspiren poesía. Y cuando me dispongo a escribir un rellatu, o un cuentu pa neños, anque seya en versu,  pues siempre hai una idea detrás.  Dalgo que quies cuntar y que pue gustar al públicu pal que lo prepares.   Pue dicise que depende del momentu nel que te dispones a escribir, y  de la motivación que te lleva  a espresate d’una u d’otra manera. En tolos xéneros hai que facer y refacer  y romper fueyes. Y dexes de miralu y remiralu, dexes de  corregir, cuando yá ta la última versión na imprenta porque si nun  fuera asina, hai veces que siguiríes cambiando coses. Cuando  se ve una obra acabada, siéntese satisfaición por igual.
 
El casu de Borja tamién ye asemeyáu, dientro de la ilustración tien tocaos otros ámbitos como l’animación de series y anuncios pa los más neños ¿por qué decides empobinar el to trabayu al públicu infantil?
 
B.S. - Siempre me gustaron muncho; de fechu ta costándome un poco crecer y voi más despacio qu’otra xente de la mio edá. Ye la estaya de la vida que más me gustó (a lo menos de les que conozo). Encántenme, observolos muncho. Intento imaxinar cómo ven les coses dende les sos cabeces y quedo ablucáu cuando lo faigo. Delles veces, demientres que los mito, creo qu’imito les sos espresiones ensin querelo. Dalgún padre yá se tien dao la vuelta col carru del fíu cuando los miro nel metro…
Per otru llau demándase más animación pa neños que p’adultos. Les más de les películes d’animación que se tán faciendo n’España son pal públicu infantil. Pero tamién me presta facer coses más adultes, tocando asina tolos palos. Soi lo que nel mundu llaboral se llama un xeneralista.
 
La última pregunta ye obligada, dende la vuestra esperiencia ¿cómo veis el panorama de la lliteratura infantil y xuvenil n’asturianu?
 
E.G. - Meyor que nunca, eso ye evidente. Pero inda fai falta muncho más, sobre too de dalgunos xéneros, como la poesía o'l teatru, tan importante pa los neños. De toles formes, pa facer lliteratura hai que tar motivaos, saber que tenemos un públicu llector preparáu y anque nesti sen, gracies a la escolarización  andúvose  abondo , inda falta muncho camín por andar. Necesitamos que los neños tengan la mesma facilidá y entusiasmu por lleer n’asturianu qu’en castellanu. Pasa que la normalización va muncho más despacio qu’otros aspeutos de la recuperación de la llingua, como puen ser la normativización o la lliteratura. Amás de tar los neños  escolarizaos (que nun son toos), los pas tienen que tar concienciaos de la importancia que tien pal deprendimientu y usu de la llingua que los neños llean llibros n’asturianu, y tamién pa que depriendan a amar la llingua y a identificase con ella.
Pero, como digo, fáltanos el sofitu políticu, la sensibilidá de los nuesos gobernantes  pa cola llingua asturiana. Necesítase que la so presencia nos medios de comunicación nun seya testimonial. Nuna palabra, fai falta la oficialidá, pa poder dir algamando la normalización en tolos estamentos de la vida social. Asina los escritores tendrémos l’ésitu aseguráu.
 
B.S. - A mi tamién me paez que nun hai muncha demanda y que la ufierta, anque paez qu’agora hai más, ye poca. Creo qu’ente estos sectores nun hai muncho interés pola lliteratura asturiana (nin pola lliteratura en xeneral), sinón querencia pol asturianu. Sicasí son impresiones más que certeces.