Saludos 25 Aniversariu

 

Un cuartu de sieglu del meyor periodismu, n’Asturies y n’asturianu

El periódicu dixital Asturies.com cumple 25 años. Dende l’Academia de la Llingua Asturiana queremos felicitalu d’un mou especial, non solo por ser a caltenese nel tiempu como mediu de comunicación, sinón pola so contribución al afitamientu del estándar de la llingua asturiana, pol rigor de los sos plantegamientos informativos y, lo que ye inda más importante, por amosar que l’asturianu ye una llingua moderna, áxil y vidable pa pescudar y entender la vida social, cultural y política del nuesu rodiu.

Pero ye que, arriendes d’ello, Asturies.com foi, dende los sos anicios en 1997, ún de los medios de prensa asturianos que más ceo vio les posibilidaes qu’ufría la rede internet a la hora de trabayar con una llingua minoritaria y minorizada como ye la de nueso. Ensin dulda ehí xugaron un papel fundamental dos persones d’una enorme valía profesional: David Guardado, per un llau, y Fernando de la Fuente, per otru. A dambos hai que da-yos la norabona por ser a imaxinar lo que dempués acabó siendo una empresa teunolóxica, Araz.net, que, dende llueu, podemos considerar como emblemática dientro de los plantegamientos que’l desarrollu periodísticu en rede esixe pa una Asturies dafechu dinámica y complexa y con perspeutives de futuru.

En fin, Asturies.com ye, de xuru, una realidá viva y cotidiana nel país, pero, según una opinión abondo espardida, inda podría dar un reblagu más que lu convirtiere nel principal mediu dixital asturianu. Esi ye’l so principal retu y el nuesu mayor enfotu.

 

Xosé Antón González Riaño

Presidente de l'Academia de la Llingua Asturiana

Pages