Asturies.com, pionera y necesaria
Alcuérdome d’una entrevista que-y fici a Rubén Ardura nel Barucu, dientro del programa Señalados de Teleasturias, pa falar d’Asturies.com. Hai lo menos quince años d’aquello y pasaron camudando muches coses. Asturies.com sigue y ye agora tan necesaria como entós.
Foi una iniciativa pionera, que dende'l principiu aprovechaba les posibilidaes d'una Internet incipiente pa facer información independiente n'asturianu d'Asturies y non solo d'Asturies. Dende muncho primero de que la información corriere peles redes sociales, n'Asturies.com tenemos un puntu de referencia pa saber de l'actualidá del nuestru país y especialmente de la nuestra cultura, con un formatu dignu y afayadizu. Si vas a los rexistros más vieyos que queden nos archivos online, pues ver qu'en 1997 Asturies.com, d'aquella 'Asturia', lo mesmo daba serviciu públicu informando de convocatories de subvenciones autonómiques a proyectos de telecomunicaciones que daba anuncia de campeonatos de videoxuegos.
Tamién foi pionera en facer divulgación sobre la llingua asturiana y ufrir recursos pal so deprendizaxe. Una xera reforciada pol bon llabor nel cuidáu de los usos y rexistros llingüísticos en tola so información dende los principios.
Nestos tiempos onde s'echen en falta espacios que valgan pa texer rede, pa facer en comuña, hai que valorar más que nunca un sitiu como Asturies.com, que lleva un cuartu de sieglu faciendo comunidá asturfalante y asturianista dende lo dixital.
Sofía Castañón
Coordinadora autonómica de Podemos Asturies
