Ún de los fitos hestóricos pa la llingua asturiana produzse cola fundación de Conceyu Bable por un garrapiellu de xóvenes universitarios. Los sos plantegamientos estrémense de los de les xeneraciones anteriores por un compromisu claru cola normalización social de la llingua asturiana.
Cronoloxia
Esta cronoloxía pretende facer un repasu a feches nes que pasaren acontecimientos que de d'una o otra manera supunxenon un fitu na hestoria de la llingua d'Asturies. Esta ye la nuesa clasificación que pol mesmu calter de la mesma nun dexa de ser arbitraria. Sicasí pue valir pa facese una idea de la evolución de la nuesa llingua nel tiempu.
1974: Fúndase Conceyu Bable
1976: Manifestación: Bable a la Escuela
Una de les primeres peticiones del movimientu reivindicativu de la llingua asturiana ye'l pidimientu del deprendimientu de la llingua nes escueles. Entámase una campaña masiva de pintaes Bable nes Escueles y les reivindicaciones lleguen al so puntu más altu cola manifestación celebrada en Xixón, a la qu'asisten más de 5.000 persones, na que tamién se pidía Autonomía p'Asturies.
1980: Academia de la Llingua Asturiana
En 1980 l'organismu de gobiernu preautonómicu asturianu apreba la creación de l'Academia de la Llingua Asturiana col envís de favorecer l'estudiu, la conocencia y dignificación de la llingua hestórica d'Asturies.
1981: Llingua y autonomía
El principáu d'Asturies conviértese nuna comunidá autónoma del Estáu español. Los asturianos puen escoyer a los sos representantes políticos, qu'ente otres munches funciones tendrán que desendolcar una política llingüística. L'Estatutu d'Autonomía reconoz la protección de la llingua col nome de bable y afala'l so usu y enseñu.
1984: La llingua a les escueles
Diez centros pilotos entamen a dar clase d'asturianu. La llingua ta por primer vez dientro del sistema educativu. Anque ye un procesu sele y con dellos problemes, la matriculación n'asturianu nun para de medrar. Pesie a les torgues, anguaño 20.000 escolinos deprenden llingua asturiana nel colexu.
