Espaciu y Tiempu de la Llingua Asturiana

Cronoloxia

Esta cronoloxía pretende facer un repasu a feches nes que pasaren acontecimientos que de d'una o otra manera supunxenon un fitu na hestoria de la llingua d'Asturies. Esta ye la nuesa clasificación que pol mesmu calter de la mesma nun dexa de ser arbitraria. Sicasí pue valir pa facese una idea de la evolución de la nuesa llingua nel tiempu.

2010: Principia a furrular Eslema

El 11 de febreru, a les 11 hores, principió a furrular Eslema, un traductor en llinia asturianu-castellanu. Daniel Vicente Quílez, Arsenio Coto, María Fernanda García y Roberto Hinojal, recién llicenciaos en Filoloxía y Inxeniería Informática pola Universidá d'Uviéu, encargáronse del desarrollu d'esta ferramienta bien útil desenvuelta a partir del motor de traducción Apertium.

2010: El Tribunal Constitucional afita la constitucionalidá de la Llei d'Usu

El Tribunal Constitucional refugó a lo último la cuestión d'inconstitucionalidá contra la Llei d'Usu y Promoción del Asturianu/Bable presentada pol Xulgáu de lo Contencioso Alministrativo d'Uviéu. La impugnación vieno tres plantegar el lletráu del Principáu, Xurde Blanco, un recursu contra una resolución que-y refugaba la solicitú d'un permisu llaboral por tar redactada n'asturianu.

2011: Créase la Comisión de Normalización Llingüística na Universidá

El rectoráu de la Universidá d'Uviéu dio lluz verde a la creación de la Comisión de Normalización Llingüística col oxetu de cumplir les previsiones del artículu 6 de los estatutos nuevos de la Universidá, en rellación cola proteición y usu de la llingua asturiana. Trátase d'un pasu perimportante pa la dignificación del idioma del país na institución.

2012: El Tribunal Supremu elimina la ratio mínima pa cursar Llingua Asturiana

El Tribunal Supremu’l tornó'l recursu de casación interpuestu pol Lletráu del Serviciu Xurídicu d'Asturies y confirmó la nulidá del artículu 5.1 de la Resolución del 16 de mayu del 2008 de la Conseyería d'Educación pola que s'establez la ufierta y les condiciones pa la eleición de materies optatives y materies opcionales pa la Educación Secundaria Obligatoria (ESO), qu'establecía un númberu mínimu d'ocho alumnos pa formar un grupu na asignatura de Llingua Asturiana y Gallego-asturiano en Secundaria. D'esta forma, da la razón al sindicatu Comisiones Obreres (CC OO) y permite a los neños y neñes estudiar l’idioma ensin depender del númberu d’escolinos qu’haya en clase.

2013: Un estudiu amuesa l'apoyu ampliu de los equipos direutivos de centros públicos de Primaria al enseñu de la Llingua Asturiana

La investigación 'Valir cultural y educativu de la escolarización de la Llingua Asturiana', fecha por Isabel Hevia, del departamentu de Ciencies de la Educación de la Universidá d'Uviéu por encargu de l'Academia de la Llingua Asturiana, amuesa un sofitu ampliu de los equipos direutivos de centros públicos de Primaria al enseñu de Llingua Asturiana y Gallego-asturiano: alredor del 90 por cientu ve a la escolarización del idioma un valir cultural y social. Los resultaos son asemeyaos a los d'otros estudios sociollingüísticos fechos con anterioridá.

Pages

Coneyería d'Educación y Cultura
Espaciu y Tiempu de la Llingua Asturiana
--Araz.net, © 2010. Tolos derechos reservaos.