Un taller-conferencia va averar en Corvera a la reciella la figura de Xosefa de Xovellanos

Xosefa de Xovellanos por Laura Iglesia

'Xosefa de Xovellanos' abrió un proyeutu de Pintar-Pintar pa dar a conocer biografíes de muyeres. El so autor Vicente García Oliva y la ilustradora Ilemi Cuesta van poner en Corvera un orixinal taller-conferencia sobre la escritora –que va tar presente al traviés de Laura Iglesia– pa dar a conocer la so figura a la reciella.

Esta biografía orientada a neñes y neños asoleyada esti añu va servir de base a García Oliva pa rellatar a los presentes la vida y obra de la ilustrada. L'actriz Iglesia, mentes, va ponese na piel de la xixonesa, y Cuesta va conducir la parte de taller centráu nel so dibuxu.

Tamién va tar presente nesta actividá de baldre que va principiar a les 18.30 hores d'esta tarde nel Centru Sociocultural de Les Vegues la editora Ester Sánchez. Pa participar ye necesario avisar enantes con un mensaxe al traviés de l'aplicación WhatsApp qu'incluya los datos de los asistentes al númberu 684.617.879.