"Nomes d'Asturies" llega al aula
La Conseyería d'Educación del Principáu d'Asturies en collaboración col CPR d'Uviéu ta acabante d'espublizar el material didáctico "Nomes d'Asturies" ellaboráu a partir del programa de radio del mesmu nome.
El llibru-CD, que tamién pue descargase en rede ta pensáu pal apoyu de les clases de Llingua Asturiana, sobre manera de la Educación Secuandaria, y ta compuestu por nueve unidaes didáctiques basaes nos audios del programa de la RTPA “Nomes d’Asturies” qu’usa la fórmula de radio-teatru. Nes distintes unidaes trabáyense les destreces básiques nel estudiu de cualquier llingua viva: comprensión y expresión escrites y comprensión y expresión orales. Les actividaes propuestes desarrollen estratexes pa utilizar la radio nes clases d’asturianu: audiciones, antoloxía poética, guiones radiofónicos, notes culturales, estaya gramatical, lliteratura, llingua y cultura, atención a la diversidá, etc. Too ello cola intención d’ufiertar una ferramienta moderna, útil y prestosa cola qu'estudiantes y profesores puedan trabayar la llingua asturiana dende un mediu de comunicación de mases como ye la radio.