Mines de Texéu

Na sierra L’Aramo atopamos ún de los elementos históricos, naturales y arqueolóxicos más destacaos del país. Trátensen de les mines de Texéu, nel conceyu de Riosa, que s’esplotaron en tiempos prehistóricos.

Ye difícil datar el tiempu exautu nel que’l ser humanu trabayó nes galeríes de Texéu, pero se considera que nel 1.500 a.C. yá hebo actividá nel llugar. Dellos restos humanos y pieces de trabayu, como martillos de piedra, cuchillos de güesu o astes de venáu, etc. atopáronse nel llugar y dan fe de l’actividá.


Bocamina
¿Sabíes qué…? El Muséu Arqueolóxicu d’Asturies, n’Uviéu, acueye esqueletos humanos allugaos nesti llugar que se cree que morrieron n’accidentes mineros.

Sería nel añu 1.888 cuando’l belga Alejandro Van Straalen descubrió evidencies del pasáu del llugar. Taba buscando una bocana de la caliza que suponía fecha pol home y, pol movimientu de les fueyes d’un árbol, atopó una corriente d’aire por una chimenea.

La estraición del cobre yera l’actividá principal nesta zona, con presencia tamién de cobaltu y níquel y, dende’l final del sieglu XIX Texéu vivió un gran esplendor pol so potencial mestos materiales. The Aramo Cooper Mines Ltd., de capital inglés, foi la primer empresa en trabayar les mines, del 1897 hasta’l fin de la Primer Guerra Mundial, mentes que la Sociedad Minero Metalúrgica Asturiana tomaría’l relevu ente’l 1947 y el 1960, cuando se trancó al ser más barata la estraición del mineral en mines a cielu abiertu en países d’América.


Mines
¿Sabíes qué…? Los romanos tamién esplotaron estes mines pola calidá del mineral esistente.

Col pieslle definitivu de la esplotación, llegaría l’abondonu de la zona una vegada más. Namái montañeros o sienderistes avérense al llugar faciendo dalguna de les rutes que percuerren esta guapa zona d’Asturies.

La visita paga la pena por ver los restos del pobláu mineru, onde ta asitiáu’l mirador inauguráu nel añu 2015, y les impresionantes bocamines tallaes na piedra. Sicasí, el paséu pela zona ha de ser con precaución pol estáu d’abandonu del llugar y la falta de señalización.

  • ¿Qué sabes de la sierra L’Aramo?
  • ¿En qué se diferencia esta mina de les de carbón?
  • ¿Pa qué val el cobre?
  • ¿Cuáles son anguaño los países mayores productores de cobre y por qué?

 

Rellaciona estes mines col conceyu nel que tán asitiaes:

María Luisa
 
El Sotón
 
Berbés
 
Arnáu
 
Figareo
 
Texéu
 
Llangréu
SMRA
Ribeseya
Castrillón
Mieres
Riosa