Mazos y ferreríes

El trabayu del fierru n’Asturies tien una tradición amplia. La primer idea que pues tener son les grandes siderurxes d’Avilés y Xixón, pero dende sieglos atrás predominaron per tola xeografía ferreríes, siderurxes antigües.

Especial puxu tuvieron les ferreríes hidráuliques, que s’estendiéronse principalmente nos sieglos XVII y XVIII. Tanto éstes como les anteriores, manuales, tienen como elementu común l’emplegu del mazu pa trabayar el fierro, que nel mecanismu movíu pol agua compónse d'una rueda con engrane que fai cutir unos mayos.


Mazonovo (Santalla d'Ozcos)
¿Sabíes qué…? El Catastru del Marqués de la Ensenada, de mediaos del sieglu XVIII, censó 1.557 artesanos metalúrxicos n'Asturies

L’abondanza del mineral de fierro y cobre, y la presencia d’agua, con cayida suficiente pa mover los mecanismu provocó esta presencia importante nel país, a lo qu’hai que sumar el fácil accesu a madera pa los fornos onde fundir dichu mineral. La fastera occidental, sobre manera, foi onde más ferreries s’asentaron, rescamplando conceyos como Taramundi, Somiedu o Miranda.

Estes siderurxes asitiábense al pie de ríos pequeños, con pendiente. L’agua acumulábase nun banzáu asitiáu na zona superior, pa pasar per una canal y llegar a les ruedes con movíen los mazos coles que se trabaya’l mineral fundíu pa dar forma a los preseos fechos con esti metal.


Os Teixois (Taramundi)
¿Sabíes qué…? Estes téuniques tuvieron vixentes hasta la llegada del sieglu XX, cuando s’empezaron a emplegar fornos altos y la producción entamó a facese a nivel industrial.

La sidereruxa asturiana foi y sigue siendo mui potente n’Asturies. Duro Felguera, en Llangréu, y la Fábrica de Mieres convirtiéronse nes primeres empreses siderúrxiques a últimos del sieglu XIX, y a mediaos del XX axuntáronse n’UNINSA cola xixonesa Moreda, darréu absorbida pola empresa estatal ENSIDESA, con sede n’Avilés, anguaño la conocida ArcelorMittal con plantes n’Avilés y Xixón.

Os Teixois, en Taramundi, y El Mazonovo, en Santalla d’Ozcos, son dos conxuntos etnográficos onde podemos atopar mazos y ferreríes, y conocer cómo funcionaben. La so visita ye recomendada si quies afondar más nesta téunica pa trabayar el fierro que tien tanto que ver cola nuesa identidá.

  • ¿Pa qué s’usaba’l fierro que se trabayaba nes ferreríes?
  • ¿Por qué yera importante l’agua?
  • Aparte d’esti oficiu, ¿cuáles otros conoces importantes na cultura asturiana?
  • ¿Ónde tán anguaño les principales siderurxes asturianes? ¿Y hasta’l sieglu XX ónde había más tradicionales?

 

Enllaza estos llugares colos conceyos venceyaos a la siderurxa nos que s’asitien:

Balmonte
 
Veriña
 
La Pola
 
Bres
 
A Ferraría
 
Villalegre
 
Miranda
Xixón
Somiedu
Taramundi
Santalla d’Ozcos
Avilés