Lucía Fernández llevó’l IV ‘Sácame pola pinta’ pola so imitación de Valle Roso

Lucía Fernández ganadora IV Sácame pola pinta Marisa Valle Roso

La xixonesa Lucía Fernández ganó’l IV ‘Sácame pola pinta’, concursu d’imitación d’artistes asturianos que se celebró’l vienres en La Felguera y que se va emitir el xueves en TPA. La cantante, de 14 años, convenció al xuráu pola so interpretación de la versión de Marisa Valle Roso del cantar ‘Nel Pozu María Luisa’.

La propia artista llangreana vivió dende’l Teatru Nuevu l’actuación de Fernández, que consigue asina’l premiu consistente na grabación d’un discu de cuatro cantares nun estudiu profesional acompañáu d’un instrumentu, que va tener una tirada de cien copies en en caxa de cartón. Precisamente na final del concursu, celebráu’l vienres, presentóse’l CD de la ganadora del añu pasáu por una imitación de Luz Casal, Celia Corrales, qu’abrió la gala con ‘Vengo del norte’.

El xuráu formáu por Ramón Blanco, Ana Morán y David Varela decidióse por Fernández depués de ver les interpretaciones en direuto de los diez neños y neñes menores de 18 años que pasaron el casting ente los 27 concursantes. Éstos foron Pilar González, qu’imitó a Mapi Quintana; Xana Martínez, a Silvia Quesada; Lucas Santiango, a Víctor Manuel; Paula Tauriño, a Paula Rojo; Irene Álvarez, a La Pastorina; Pablo Menéndez, a Tino Casal; Lucía Díaz, a Vicente Díaz; Ainhoa García, a Raquel del Rosario; y Simón Buelga, a Chus Pedro.

La gala foi grabada por TPA, que va emitila mañana a les 22.20 hores. El Grupo A Mansalva, entamador del concursu, va abrir darréu al traviés de les sos redes sociales –nes que va colgar videos de les actuaciones– la votación popular pa escoyer el ganador del públicu.