La esfoyaza, una actividá en comuña
![](https://asturies.com/sites/default/files/Esfoyaza.jpg)
Na tradición asturiana hai munches actividaes que se faen en comuña. Una d’elles ye la esfoyaza, na que los vecinos s’axunten pa quitar les fueyes al maíz y axuntar les panoyes en riestres. Equí esplicámoste los detalles d’esti acontecimientu entovía vivu pese a la progresiva desapaición del mundu rural.
¿Qué ye esfoyar?
Según el Diccionariu de la Llingua Asturiana, na so primer acepción, ye “quitar la fueya a [el maíz], a [un árbol], a [un llibru]”.
¿Y la esfoyaza?
Conozse como la xuntanza de persones, vecinos y familiares, pa esfoyar el maíz n’andecha.
¿Qué tien esto d’especial?
Trátase d’una tradición asturiana perguapa, yá que nella participen tolos vecinos en comuña y conviértese en toda una fiesta.
¿Cuándo se fai?
Na seronda, principalmente a finales de setiembre y n’ochobre. Ye nesta fecha cuando se recueye’l maíz.
¿Cómo s’organizaba?
La xente reuníase peles nueches p’ayudar a los vecinos a esfoyar la so producción de maíz. Facíase nuna zona amplia, pa tar cómodos nel llabor, y aprovechábase’l momentu pa falar de les novedaes del pueblu, cantar o contar lleendes y tradiciones. Tamién yera un bon momentu pa cortexar.
¿Por qué se facía?
Pola cantidá de maíz que se producía, lo que dificultaba a les families facer la esfoyaza en solitario.
¿En qué consiste esactamente?
Tradicionalmente, un grupu de persones –principalmente muyeres y neños– dedicábase a esfoyar les panoyes, dexando namái les fueyes más fuertes, que serviríen pa enriestrales depués, de lo que s’ocupaben los homes.
¿Qué se facía con elles?
Colocábase nel horru o na panera al día siguiente, pa dexalo fuera del alcance de royedores u otros animales.
¿Cuánto duraba la esfoyaza?
Depende de la producción, pero podría dende ún a dellos díes.
¿Celebrábase la so finalización?
Sí, de manera destacada. Los dueños de la casa, al finar el llabor, convidaben a la garulla, que podía tar compuesta por castañes, mazanes, avellanes, nueces y sidra dulce. Tamién se celebraben xuegos tradicionales y bailles.
¿Sigue habiendo esfoyaces?
Sí, anque más por caltener la tradición que por necesidá d’ayuda nel llabor.