La escanda

La escanda ye una planta cereal de los xéneros Spelta y Triticum, asemeyada al trigu, que da granu comestible. N’Asturies tuvo una importante implantación y ye un productu mui valoráu, anque per munchos años foi fuertemente desplazáu pola llegada del maíz y la introducción de trigos que daben una mayor producción hasta’l puntu de cuasi desapaecer.

Ye un cereal que s’adaptó mui bien al territoriu asturianu y al so clima al ser de los nomaos ‘vistíos’, esto ye, cuenta con una cáscara difícil de separtar, polo que reclamen unos molinos especiales. Sémase n’iviernu, del mes de payares a xineru o febreru.

Tamorlan, CC BY-SA 2.5 <https://creativecommons.org/licenses/by-sa/2.5>, via Wikimedia Commons
Escanda(Ḷḷena)
¿Sabíes qué…? Pravia, Ḷḷena, Quirós, Ayer, Miranda, Candamu o Grau son dalgunes zones onde esti cultivu tien presencia.

Espertos asitien el so orixe nel Neolíticu mediu ente l’Eufrates y el Tigris, zona qu’anguaño pertenez a Irán. La so llegada a Asturies nun ta constatada, anque apez documentada n’escavaciones arquelóxicas de trés castros de Xixón y Villaviciosa.

Nun sería hasta’l sieglu X cuando se convertiría nel cereal predominante, figura que caltendría hasta’l sieglu XIX, produciéndose un descensu progresivu nes décades últimes d’esta centuria y nel sieglu XX hasta causi desapaecer. Ye nel actual cuando entama a recuperase’l so cultivu, anque de manera entovía mui reducida.

Astur1, Public domain, via Wikimedia Commons
Erga d'escanda
¿Sabíes qué…? La Crónica albeldense, nel añu 833, recueye la primer referencia escrita “a la escanda d’Asturies’, rescamplándola como ún de los alimentos importantes del momentu.

Los productos fechos con escanda son mui valoraos. La ellaboración de pan ye’l principal destín d’esti cereal y práuticamete tola producción que s’ellabora véndese pola escasa superficie cultivada y la importante demanda.

L’Asociación Asturiana de Productores de Escanda (ASAPES) vien trabayando dende’l 2002 pola recuperación de les variedaes autóctones d’escanda y l’ameyoramientu y modernización del so cultivu, que tien unos costos altos de producción, asina como la so promoción. Un llabor, el de tolos productores, que permite ser optimista sobre’l futuru d’un cereal con muncha historia y raigañu n’Asturies.

  • ¿Qué ye la escanda?
  • ¿Pa qué s’emplega?
  • ¿Ú tien el so orixe?
  • ¿Ta en peligru de desaniciu?

 

Enllaza estes poblaciones col conceyu con cultivos d’escanda al que pertenece:

Bárzana
 
Ambás
 
Somáu
 
Grullos
 
Campumanes
 
Balmonte
 
Quirós
Grau
Pravia
Candamu
Ḷḷena
Miranda