La caza la ballena n'Asturies

Les ballenes son unos de los animales más maraviyosos del planeta. Viven na mar, pero nun son pexes, son mamíferos como nosotros, y destaquen pol so gran tamañu, llegando a midir hasta más de 20 metros según les especies.

Hai non tantos años yera habitual la so presencia n’agües del Cantábricu y trátabase d’un animal mui preciáu polos pescadores, yá que ofrecía munchos bienes aprovechables pa ellos. De los cetáceos sácabase carne, pero tamién aceite, y dábase utilidá hasta los pelos de les sos barbes o los güesos.


Ballena franca
¿Sabíes qué…? En Xixón ye mui típica la espresión ‘vete a ver la ballena’, que se xestó pola presencia nel 1.895 d’un exemplar de 23 metros na sablera de San Llorienzo trayíu por un barcu pesqueru que l’atopó muerta n’alta mar. Úsase cuando quies que dalguien dexe de molestate.

Dao’l so valor, la caza de la ballena diose n’Asturies mientres sieglos, sobre manera a lo llargo de la Edá Media. Hai documentación que rellata esta prautica en los puertos asturianos de Xixón, Tazones, Lluanco, Avilés, Cuideiru, Veiga, Ḷḷuarca, Ribeseya, Llanes...

Los primeros escritos daten esta práutica nel sieglu XIII, siendo’l más antiguu del 1.232 en Carreño. Pa cazales emplegábasen arpones, siendo habitual les vixilancies dende sitos altos de la mariña pa divisar cetáceos y salir a la so busca a alta mar.


Güesos de ballena (Veiga)
¿Sabíes qué…? Son habituales nos cais asturianos los topónimos venceyaos a esta práutica. En Xixón tenemos ‘El tránsitu de les ballenes’, onde tamién ta ‘L’atalaya’, que yera’l llugar d’onde s’avistaben y que se repite en Tazones y n’otros munchos llugares.

La ballena franca, la más habitual nel Cantábricu y anguaño ún de los cetáceos más amenazaos del planeta, dexó de vese nes nueses costes nel sieglu XVIII. Énte la so ausencia, esta práutica tan importante nel so tiempu pa la economía de les villes pesqueres foi quedando nel escaezu.

Anguaño les ballenes son animales en peligru de desaniciu. Son numberosos los estaos que prohibieron la so caza nes décades últimes, anque entá hai dalgunos que siguen permitiéndolo como Xapón, Islandia o Noruega.

  • ¿Qué ye un cetaceu?
  • ¿Por qué yeren tan deseaes les ballenes?
  • ¿Qué facién l’atalayeros?
  • ¿Cómo se cazaben estos animales?

 

Rellaciona estos texos col conceyu nel que tán asitiaos:

Cormorán
 
Bocarte
 
Xaronca
 
Ballena
 
Moxón
 
Bugre
 
ave
pexe
anfibiu
cetaceu
moluscu
crustaceu