Continentes y países

5 Ochobre, 2014
Asturies.com

Por continente entiéndese una gran masa de tierra asitiada nel globu terrestre –inclúinse tamién les isles cercanes– separaes d’otres por océanos, anque la definición nun ta nidia del too y esisten dellos modelos pa clasificar los continentes. Por exemplo, Europa y Asia considérense continentes diferentes, pero realmente tán xuníos, polo que dalgunes persones califiquen a Eurasia como un mesmu continente.

La clasificación clásica de continentes cifra’l so númberu en cinco: Europa, América, Asia, África y Oceanía. Otros sumen un sestu, l’Antártida, que nun entra na clásica al ser una estensión de tierra non habitada. Menos estendíos son los que dixebren América en dos partes: Norteamérica –inclúise nella a Centroamérica– y Sudamérica.

Panxea

¿Sabíes qué…? Munchos años atrás, tolos continentes taben xuníos nún solu que recibe’l nome de Panxea. Hai 200 millones d’años principió a frayase y alloñase, dando llugar a los actuales continentes.

Un país ye un territoriu que tien determinaes carauterístiques xeográfiques y paisaxístiques o una población que comparte unes mesmes carauterístiques sociales, históriques, económiques, relixoses y culturales que pueden tener reflexu n’instituciones polítiques propies. Teniendo en cuenta estes definiciones, Asturies ye un país, anque nun tien el calter d’Estáu. Sicasí, munches persones utilicen el términu ‘país’ pa referise a estaos soberanos.

Los continentes tán conformaos por estaos y países, siendo, por razones históriques, Europa’l que más naciones suma nel so territoriu en rellación cola so estensión. En númberu total ye África, con 54, el que más tien. El total de naciones reconocíes nel mundu ye de 202.

Bandera de Sudán del Sur

¿Sabíes qué…? L’últimu país n’algamar la so independencia y, poro, l’estáu más mozu del mundu, ye Sudán del Sur. Esta nación africana nació’l 9 de xunetu del 2011 tres dixebrase de la República de Sudán.

Si miramos la estensión, el país más grande del mundu ye Rusia, con 17.098.242 quilómetros cuadraos, siguíu de Canadá (9.984.670) y China (9.596.960). Si falamos de población, la llista encabézala China, con 1.300 millones d’habitantes, superando a la India (1.200 millones) y a Estaos Xuníos (319 millones). L’Estáu español ye’l vixésimonovenu más pobláu, con 46 millones, y el númberu 52 n’estensión, con 505.370 quilómetros cuadraos.

No que se refier a los continentes, Asia ye’l qu’ocupa más superficie (43 810 000 quilómetros cuadraos) y el que rexistra un mayor cantidá d’habitantes. En total, nel mundu hai 4.140 millones d’asiáticos, lo que representa alredor d’un 60 por cientu de la población mundial, que se cifra en más de 7.000 millones.