El Sidrón

La cueva d’El Sidrón, asitiada en Piloña, na parroquia de Boriñes, ye una de les muches qu’esiste n’Asturies, pero nun se trata d’un covarón más. Aparte del so tamañu, que la convierten na más grande de piedra caliar non carbonífera, dientro guardó y guarda auténtiques ayalgues que faen que’l so nome tenga anguaño ecu mundial.

Yá se conocía la esistencia de pintures rupestres del Paleolíticu nel so interior, pero un acontecimientu nel 1994 cambiaría pa siempre’l destín d’esta cavidá. Dos espeleólogos xixoneses atopaben dos mandibules humanas qu’estudios posteriores afitaben que pertenecíen a dos homo nearderthalensis, lo que sería l’entamu d’unes investigaciones que sacaríen a la lluz ún de los xacimientos más importantes del mundu, clave pa conocer esta especie yá desaniciada que convivió col Homo sapiens.

hairymuseummatt, CC BY-SA 2.0 <https://creativecommons.org/licenses/by-sa/2.0>, via Wikimedia Commons
Comparación entre craneu d'home modernu y Neandertal
¿Sabíes qué…? Los neandertales son un homínidu yá desaniciáu que convivió n’Eurasia en tiempu colos nuesos antepasaos.

Les campañes entamaes dende l’añu 2000 na cueva sacaron a la lluz más de 2.500 restos óseos y de 400 instrumentos de piedra emplegaos por neandertales hai 49.000 años. Ye la coleición más completa de la Península Ibérica, atrayendo a numberosos investigadores.

Dichos restos correspuenden a 13 persones: siete adultos y seis menores d’una mesma familia. Son los nomaos ‘13 d’El Sidrón’, que nos permitieron conocer muncho más sobre los neandertales gracies a los esqueletos y dientes atopaos y la secuenciación del so ADN mitocondrial nel 2005.

Nilenbert, Nicolas Perrault III, CC BY-SA 3.0 <http://creativecommons.org/licenses/by-sa/3.0/>, via Wikimedia Commons
Neandertales n'Europa
¿Sabíes qué…? Los restos d’El Sidrón aportaron a nós gracies al agua d’una tormenta que los arrastró al interior de la cavidá, a la nomada ‘Galería de los Güesos’, y los tapó con sedimentos que permitieron la so conservación.

Asina descubrimos que tenemos ADN neandertal, qu’estos homínidos tenien una gran masa musculur, que podíen falar, qu’usaben la boca como una tercer mano o que yeren roxos y de piel clara. L’estudiu de los instrumentu atopaos, cuchiellos de sílex de Piloña, desvelaron que los ‘13 del Sidrón’ yeren diestros polos cortes fechos, y que prauticaben canibalismu, al igual qu’otros grupos neandertales estudiaos n’Europa, posiblemente como ritual.

Pa conocer más sobre los neandertales y El Sidrón recomendámoste la visita a la esposición ‘Los 13 d’El Sidrón’. Ésta ta nel Centru de Receición de Visitantes de Piloña Tierra de Asturcones, en L’Infiestu, yá que la cueva nun ye visitable.

  • ¿Qué tenemos en común colos nendertales?
  • ¿En qué época vivieron?
  • ¿Por qué ye importante la cueva d’El Sidrón?
  • ¿Qué provocó que los restos del ‘13 d’El Sidrón’ llegaren a los nuesos díes?

 

Asitia estes cueves asturianes nel conceyu nel que tán:

Pindal
 
Peña
 
Arbedales
 
Lluera
 
El Pozu’l Ramu
 
El Sidrón
 
Ribedeva
Candamu
Castrillón
Uviéu
Ribeseya
Piloña