El mirandés

30 Payares, 2020
Pablo R. Guardado

El mirandés ye la variedá del asturlleonés que se fala en Miranda de l Douro, territoriu portugués que llenda con Zamora. Esta llingua ta reconocida pola República Portuguesa dende’l 1998 y emplegada poles instituciones llocales, polo que se podía dicir que ye cooficial xunto col portugués magar qu’esta figura nun esiste como tal na llexislación portuguesa.

La esistencia d’una normativa basada na gramática portuguesa y estremada de la de l’Academia de la Llingua fixo qu'hubiera un tiempu nel que l'intercambiu cultural ente Miranda y Asturies fora cuasi inesistente, dalgo que ta camudando n'años últimos gracies al entamu de contautos ente la institución académica y l'Associação de Língua e Cultura Mirandesa. Estes bones rellaciones ente asturianos y mirandeses lleguen inclusive a nivel institucional, col hermanamientu ente'l Conceyu de Bimenes y el Município de Miranda de l Douro.

Casa de la Lhéngua Mirandesa

¿Sabíes qué…? El mirandés fálase nes 30 poblaciones del conceyu de Miranda de l Douro, pero tamién en 3 de Bumioso, dambos pertenecientes al distritu de Bergáncia, asitiáu na fastera oriental de la rexón histórica de Trás ls Montes i Alto Douro.

Nun esisten estudios rigurosos sobre’l númberu de falantes, pero se calcula qu’hai alredor de 7.000. Al igual que’l restu de llingües minorizaes, sufre la presión d’otra mayoritaria, nesti casu del portugués, con una perda progresiva de falantes que faen difícil la so sobrevivencia magar los esfuercios pa torgar esti procesu.

La variante llingüística mirandesa foi influyida a lo llargo de los sieglos pol portugués, polo que les sos soluciones llingüístiques estrémense dacuando de les del restu del dominiu asturlleonés. Sicasí, hai delles carauterístiques qu'asitien al mirandés dientro d’esti tueru.

Las mies purmeiras palabras an mirandés

¿Sabíes qué…? Al igual que tu, les neñes y neños mirandeses dan esta llingua nel colexu. La escolarización entamó nel añu 1985, cuasi al empar que n’Asturies, que foi nel 1984..

L’Associação de Língua e Cultura Mirandesa ye una entidá que s’encarga de promover y espardir la llingua mirandesa y el patrimoniu cultural de la Tierra de Miranda. Asina, entama cursos y actividaes de fomentu del idioma.

El reconocimientu del mirandés por parte de la República Portuguesa, xunío a la escolarización nel idioma, llevó a un aumentu de la producción de los testos escritos y una mayor demanda de los mesmos. Asina, ente les espublizaciones qu’atopamos tán, por exemplu, los cómics d’Astérix.