El gas natural y el gas llicuao

El gas natural y el gas llicuao

Últimamente fálase muncho del gas natural con motivu de la guerra n’Ucrania. La razón ye que muncho del gas natural que se consume n’Europa vien de Rusia, y esti país ta dexando de suministralo al restu’l continente creando un seriu problema enerxéticu. Ante esta situación baráxense varies alternatives, ente les que s’alcuentra la d’importar gas llicuao de los Estaos Xuníos.

Esti artículu esplica en poques pallabres qué ye’l gas natural y el gas llicuao y como se trata enantes de llegar a los llares y les fábriques.

Figura 1. Yacimientos y gasoductos de gas natural n’Europa

 

Gas natural

El gas natural ye un hidrocarburu —llámase así porque ta compuestu de carbonu y hidróxenu— que se forma pola descomposición de plantes y animales qu’esistieron fai millones d’años. Alcuéntrase en yacimientos baxo tierra a unes profundidades ente 1’5 y 4 km, bien solu o bien sobre un yacimientu de petroleu. Pa estrayer el gas natural hai que taladrar un furacu dende la superficie hasta’l yacimientu (figura 2).

De la que s’estrai, el gas natural ta compuestu d’una mezcla de gases de los que’l componente principal ye’l metanu, con una presencia ente’l 80 y el 90%, y en menor medida otros componentes como l’etanu, el propanu, el butanu, el pentanu y otros hidrocarburos, amás de nitróxenu, dióxidu de carbonu, azufre y agua.

Depués d’estrayíu, el gas necesita un tratamientu pa separtar los hidrocarburos que nun son metanu y tamién el petroleu, l’agua, l’azufre, el dióxidu de carbonu y otres sustancies consideraes como impureces.

Una vez tratáu’l gas xúbese-y la presión pa introducilu nos gasoductos y que circule per ellos a alta presión. Esta presión suel tar ente los 40 y los 80 bar, anque nos tramos que van baxo’l mar la presión xúbese hasta los 220 bar pa contrarrestar la presión del agua. Como’l gas natural nun güele nin tien color, pa facilitar la detección de fugues mézclase con un arume (metil-mercaptanu) que sirve pa detectar fugues col olfatu.

Los gasoductos son tubos d’aceru d’ente 20 y 40 pulgaes de diámetru (500 a 1000 mm) revestíos por fuera con polietilenu pa que nun s’oxiden. Son los encargaos de comunicar los yacimientos colos puntos de consumu (llares, fábriques, etc.). N’Europa y América del Norte hai redes de gasoductos tupíes d’estremu a estremu d’estos continentes. El restu continentes tienen tamién redes d’esti tipu, pero son menos tupíes.

Cuando'l gas se va acercando a los puntos de consumu va baxándose-y la presión de forma escalonada hasta llegar a les cases, onde la presión de consumu ye de solo 20 milibares (0,020 bar).

Figura 2. Estracción y tratamientu del gas natural y el gas llicuao.

 

Gas llicuao

El gas natural tamién pue llicuase. El gas llicuao conozse tamién poles iniciales GNL (Gas Natural Llicuao). La ventaxa del gas llicuao ye qu’ocupa mui pocu espaciu: un metru cúbicu de gas llicuao equival a 600 metros cúbicos de gas en condiciones normales (figura 3). Esto permite’l tresporte en barcos ente isles o continentes que nun tean comunicaos ente sí por gasoductos.

 

Figura 3. Proporción ente’l volume de gas llicuao y el del gas en condiciones normales.

 

Pa llicuar el gas ye necesario enfrialo a una temperatura per baxo los -162 ºC. L’enfriamientu faise con máquines frigorífiques especiales que trabayen con ciclos frigoríficos en cascada. Depués d’enfriao’l gas, métese dientro de depósitos aislaos térmicamente del esterior (termos) pa poder almacenalo o tresportalo a temperatura baxa.

Los termos d’almacenamientu tan construyíos con paredes dobles pa qu’haya un buen aislamientu térmicu ente l’interior y l’esterior. Dientro’l depósitu ta’l gas n’estáu líquidu na parte baxa y n’estáu gaseosu o de vapor na parte alta. La temperatura ye d’unos -162 ºC y la presión de 1 atmósfera. L’aislamientu de les paredes ye cuasi perfeutu pero non del too, polo que ye inevitable que’l calor de fuera vaya pasando pa dientro y vaya calentando’l líquidu poco a poco. Pa contrarrestar esti calentamientu lo que se fai ye sacar un poco de vapor de la parte d’arriba del depósitu; eso fai que la presión baxe y que s’esvaporice parte del líquidu; la esvaporización del líquidu tien como efeutu el so enfriamientu; d’esta forma mantiense’l GNL siempre a una temperatura constante.

Figura 4. Depósitos de recepción de GNL y puntos de conexón internacional nel Estáu.

El GNL trespórtase en buques metaneros, que tan provistos de termos adecuaos. El gas va n’ellos a temperatures per baxo los -162 ºC y a presión atmosférica. Pa contrarrestar l’aumentu de temperatura del gas lo que se fai ye sacar vapor de la parte d’arriba del termo pa producir la esvaporización y enfriamientu del líquidu. El gas sacáu úsase como combustible del propiu buque.

Los países que reciben GNL tienen depósitos termos a propósitu pa que los barcos descarguen el gas nellos (figura 4). Estos depósitos polo xeneral tan comunicaos cola rede de gasoductos. Una escepción son los depósitos de Xixón, que nun comuniquen cola rede, sirviendo solo como depósitos d’almacenamientu.

Enantes d’usar el gas líquidu ye necesario regasificalu. Pa ello fáiselu circular per dientro d’un intercambiador de calor pel que tamién circula agua de mar. Nel intercambiador el gas llicuao caliéntase y pasa al estáu gaseosu. Depués mézclase col arume y métese na rede de gasoductos pal so consumu.

Figura 5. Regasificación del GNL enantes d’unvialu al gasoductu.

 

El gas natural ye mui importante pal mundu modernu. Gracies a él los llares tienen agua caliente y calefacción, y les industries tienen enerxía pa desarrollar los sos trabayos. Ye d’esperar que’l gas pueda siguir fluyendo pelos gasoductos y poder cuntar colos sos beneficios polo menos hasta qu’otres enerxíes lu vayan sustituyendo cola mesma eficiencia y abundancia.