El Follosu llevó l’Antroxu tradicional avilesín a escolinos de la villa

El Follosu nel CP Marcelo Gago

El Colexu Públicu Marcelo Gago celebró l’Antroxu cola visita de cuatro personaxes recuperaos del Antroxu tradicional avilesín y de Les Reines del Goxu y la Faba. El Follosu foi la gran atracción ente les escolines y escolinos del centru, que disfrutaron de delles actividaes nel patiu.

L’equipu educativu del centru y l’Asociación de Familiares del Alumnáu (AFA) tán implicaos nesti proyeutu didáuticu y respetuosu coles tradiciones llocales, una propuesta educativa que ta dientro del d’Aprendizaxe-Serviciu sobre tradiciones asturianes que’l colexu desendolca dende’l 2020. Celebráu’l miércoles pasáu, a les puertes del Antroxu, llevó a La Vieya y El Cornelu xunto a dos personaxe nuevos recuperaos tamién pol Coleutivu Abillés Antroxu Tradicional, El Follosu y El Gruñu.

Especial pa esti colexu ye El Follosu, que vien a significar en bron, xíriga de los caldederos d’esti llugar avilesín, “el de les fueyes”, al tar el so traxe confeicionáu por María Concepción Díaz Fernández, madre del centru, siguiendo les referencies del coleutivu, del etnografu Alberto Álvarez Peña y d’informantes como Pepe Venancia’l de Miranda. Ésti consiste “principalmente nuna base de sacu cubierta de fueyes de panoya con dalgún otru elementu decorativu de la panoya como los granos de maíz o los tarabucos (parte central dura y ensin granu de la panoya)”.

Ye un ser d’escuridá de la comparsa que “solía socatrar a la xente tirando-y granos de maíz”. Lleva amás “una caña de maíz o narbasu con fueyes a mou d’escobón pa metese cola xente, lo que fai que se-y conoza tamién col nome d’El Narbasu”.

Les neñes y neños disfrutaron de la so presencia y del restu de personaxes prauticando actividaes como’l Trivial Tradi, les Coplas d’Antroxu dedicadas a La Vieya y xuegos como ‘Corre l’Antroxu’ o ‘A la fueyina per detrás’. La xornada finó con un baille conxuntu de consagración coles fuercies de la naturaleza, pa que’l ciclu nuevu de vida que representa la primavera sía prósperu.

El día siguiente tamién vivieron una folixa d’Antroxu modernu, que consistió nun pasucais musical de mazcaritos y una xicolatada. Nella participaron tamién los padres y docentes.