‘Aventurina l’ablana’, tercer representación de la fase de festival del VI Nel Amaro

Factoría Norte va poner sobre les tables del Teatru Filarmónica ‘Aventurina l’ablana’ como tercer finalista del VI Premiu y Festival Nel Amaro de Teatru Profesional en Llingua Asturiana y Gallego-asturiano. Trátase d’un espectáculu de pequeñu formatu pa la reciella que tresmite un mensaxe de respetu a la naturaleza y al diferente.

La protagonista ye una ablana llamada Aventurina que se pierde pela viesca y nun sabe tornar a casa. Pel camín va atopando diferentes personaxes, que van ayudala nel so viaxe de vuelta al llar.

Sheila Montes ye la intérprete d’esta obra dirixida y creada por ella mesma en comuña con Carmen Gallo y Pili Madievo na que los títeres y los cantares son los recursos emplegaos pa contar la historia. Marián García Rodríguez encargóse de la traducción al asturianu de ‘Aventurina l’ablana’, que se representa a les 18 hores d’esta tarde nel uvieín Filarmónica.

La fase de festival del Nel Amaro va completáse’l vienres viniente, nel mesmu llugar y a la mesma hora con ‘La sierva patrona’, de Producciones Nun Tris.