Aporta ‘Animalada Xabaz’, “un programa entreteníu y de calidá pa la reciella”

Animalada Xabaz A la Gueta

Estes vacaciones de Selmana Santa les neñes y neños asturianos van poder cantar, xugar y deprender cola cabra Telva, el xabaril Xuacu y la osa Sabela –falante de gallego-asturiano– xunto con dellos personaxes, ente ellos dalgún conocíu polos adultos como Cellero, El Pola o El Gallu. TPA estrena’l xueves ‘Animalada Xabaz’, “un programa entreteníu y de calidá pa la reciella”, esplica’l guionista y actor Carlos Alba.

Esta producción de Covenant Audiovisuales ye ún de los siete proyeutos escoyíos na convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA pa la ellaboración de conteníos n’asturianu nel ente públicu de comunicación. Compuestu por 8 episodios de 25 minutos caún, vien a cubrir la falta de programación infantil en TPA.

“El filo conductor de cada capítulu ye un cuentu tradicional asturianu que Cellero y la so fía Fefa (Carmen Gloria García) rellaten a los animales que van comer onde’l so horru”, esplica Alba, qu’amás d’a Cellero interpreta a El Pola, integrante del grupu Antipop creáu pal programa xunto con Maxi (Fe de Ratas), y Enol “un mozu neorrural interesáu no tradicional y que quier deprender a falar asturianu, polo qu’entruga por espresiones a Fefa”. Un momentu, ésti, que s’aprovecha pa poner una pequeña clase de llingua asturiana a l’audiencia.

Xunto con prestosos grafismos y dibuxos, de los que s’encarga David Cavernario, van asocediéndose escenes y estayes, con protagonismu pa Enol y Antipop. “Propunxe-y a Maxi, col que yá trabayaba p’adultos, que fixera la cabecera del programa y un cantar pa nenos pa cada capítulu. Son temes mui pegadizos, que pueden ser cañeros, más de rock clásicu o de reggae, que van prestar a los más mayores, de 8 a 12 años, y tamién a los adultos”, esplica Alba, qu’añade que les marionetes son afayadices pa 3 o 4 años alantre, faciendo de ‘Animal Xabaz’ un programa pa tola familia.

Ente los muñecos, diseñaos por Andrea Lobo, que manexa y da voz a la cabra Telva, rescampla la presencia de la osa Sabela, que va emplegar la llingua del occidente del país “Queríamos introducir tamién el gallego-asturiano nel programa”, apunta Alba, qu’esplica que ‘Animalada Xabaz’ surdió de la xunión d’una idea propia con un proyeutu previu de Covenant que yá incluyía estes marionetes.

Peles mañanes

El resultáu final ye “un programa entreteníu y de calidá pa la reciella qu’emplega un asturianu popular faláu con correición”, pa lo qu’Alba contó col sofitu nel guión y na cuestión pedagóxica de Milio Rodríguez Cueto y de Xosé Miguel Suárez Fernández ‘Tapia’ no que respeuta al gallego-asturiano. Amás, pel programa van pasar pa ser entrevistaos persones bien conocíes poles neñes y neños asturianos, como la escritora y miembru de ‘Reciella. Families pol Asturianu’ Iris Díaz Trancho, el músicu David Varela, l’autor y académicu Pablo Rodríguez Medina, la cuentacuentos Ana Morán y Mar Álvarez, de Pop Piquiñín, que va conocer a El Pola y El Gallu (Maxi), los integrantes d’Antipop nun ‘choque’ musical.

La estrena de ‘Animalada Xabaz’ va tener llugar mañana a les 9.45 hores, con emisión doble que tamién se va programar pal vienres, el sábadu y el domingu. Un total de 8 capítulos que, según la respuesta que tenga ente l’audiencia, podría tener continuidá nel futuru, como ye’l deséu de la productora, que va acompañar la emisión de los programes con un importante trabayu de difusión en redes sociales pa convertir a ‘Animalada Xabaz’ nun referente ente la reciella que contribuya a la tresmisión oral del idioma.

Na semeya, Cellero y la so fía Fefa xunto a los animales nuna escena de 'Animalada Xabaz'.