La ofensiva mediática contra l'asturianu

Día sí y día tamién apaecen na prensa escrita y dixital artículos contra la oficialidá y noticies que dan altavoz a persones y coleutivos de duldosa credibilidá. La ofensiva mediática que busca emporcar l’alderique sobre la reforma del Estatutu, rescatando argumentos superaos hai décades, dio’l saltu tamién a Madrid.

‘El cuento del bable’, ‘Todos en bable’, ‘El español y los cretinos’, 'Asturies de mios amores'…, son dalgunos de los artículos d’opinión apaecíos estos díes en diarios d’ámbitu estatal d’amplia difusión. Columnes qu’acompañen nes selmanes últimes a informaciones, cuando respeutoses, cuando claramente ofensives y desinformaes, sobre la situación sociollingüística d’Asturies y la oficialidá y nes qu'en munchos casos ésta plantágase como una maldición bíblica que fadría amiyar sobre Asturies les siete plagues y sedría un síntoma de la decadencia d'España como estáu.

N’ocasiones l’asturianu nun esiste. Otres, ye una llingua inventada o tien milenta de variantes qu’impiden a dos asturianos entendese ente sí a nun ser qu’empleguen el castellanu. Y pa un mesmu ‘espertu’ toles opciones son perfeutamente válides pa emporcar contra un idioma y un procesu que munchos paecen descubrir per primer vegada. Val con pasar un branu o una ponte festiva en Llanes, Xixón o Cuideiru, o tener un antepasáu asturianu, pa opinar sobre cómo Asturies va regular llegalmente l'estatus de les sos llingües.

El focu ta puestu n’Asturies y la maquinaria contra la oficialidá qu’arrancó na prensa escrita asturiana, onde se caltién con artículos diarios de persones ayenes al mundu de la llingüística, saltó agora a Madrid, onde'l tema del "bable" ye ún ye los frentes favoritos de la derecha estrema.

Mentanto, na Xunta Xeneral, los grupos parllamentarios qu’amosaron la so disposición a sofitar una reforma del Estatutu qu’incluya la oficialidá esperen la iniciativa del partíu del Gobiernu, la FSA-PSOE, pa un alcuerdu a cuatro bandes pal que Foro yá punxo condicionantes. El tiempu cuerre y l'horizonte entá nun ta claru. El testu reformáu ha llegar a tiempu pa pasar el trámite de les Cortes esta llexislatura, cumplir col mandáu constitucional y acabar con esta anomalía de falta de derechos de los falantes d'asturianu y gallego-asturiano, magar que-yos pese a munchos atrevíos intolerantes d'equí y de Madrid.