“Ye’l trabayu más completu y complexu que fixo Dixebra hasta agora”, asegura Elipe

‘Ente la niebla’, l’álbum conceptual “onde reflexonamos y facemos un exerciciu de memoria colectiva sobre la historia de les clases populares y trabayadores asturianes”, yá ye una realidá y va presentase en direuto'l 6 de mayu. El cantante Xune Elipe califícalu como’l “trabayu más completu y complexu que fixo Dixebra hasta agora, non sólo musicalmente, sinón tamién en cuanto al formatu y al conteníu en sí”.

Más de dos años de trabayu tán detrás d’esti discu-llibru que xira alredor de la historia del movimientu obreru asturianu. “Son venti cantares ordenaos cronolóxicamente, dende’l principiu del sieglu XX hasta agora, onde falamos de los momentos importantes que tuvieron como protagonista a la clas trabayadora y popular asturiana”, esplica.

Asina, nel trabayu fálase “de la emigración; de la Revolución d’Ochobre del 34; de la resistencia antifascista y del Conseyu Soberanu d’Asturies y Lleón na contienda civil; de la represión, de los fugaos, de los maquis, de la guerrilla asturiana; del surdimientu del sindicalismu al marxe del réxime franquista cola creación por exemplu de les primeres comisiones na mina de La Camocha, en Xixón, onde surde’l sindicalismu de clas como lu conocemos güei; de la Transición; del desencantu y de la reconversión industrial y les consecuencies que tuvieron na clas trabayadora asturiana, ente elles la perde de miles de puestos de trabayu y d’una xeneración pol tema de la droga, con una canción llamada ‘Caballu de Troya’; de les traiciones de determinaos estamentos sindicales-políticos a la clas obrera asturiana que se produxeron nos años 80 y 90; y de la situación y les lluches actuales”, rellata Elipe. Y como tema que pieslla l’álbum ‘El saltu final’, “que temáticamente ye más especial, distintu, porque fala d’una nave espacial que se dirixe hasta otra galaxa na que nun sabemos qué ye lo qu’hai”.

Asturies ye esa nave espacial y “esti mundu que contamos y cantamos nel trabayu ‘Ente la niebla’ si nun desapaeció yá totalmente ta a piques de desapaecer. Yera un mundu nel que primaba lo colectivo frente a lo individual y nesti momentu entornó la tortiella y tamos nun procesu de sálvase quién pueda; el sistema véndenos que la única solución qu’hai ye individual, mentantu que la historia de la clas obrera asturiana, venimos a dicir, demuestra qu’o hai una solución colectiva o nun la va haber”. En definitiva “vamos hacia otru llugar, a otru mundu, y nun sabemos lo qu’hai ellí, pero toes estes esperiencies vivíes anteriormente poles clases populares asturianes van dir con nós y quién sabe, quiciabis a lo meyor nel momentu en qu’abocane, nel que desapaeza la niebla, eses lluches siguen ehí presentes y esos principios siguen ehí presentes. Ésa ye la filosofía que tien esti trabayu”, confirma.

Anita Sirgo

Sobre l’orixe d’esti trabayu, que llega col 35 aniversariu de la banda, el cantante confesó que “nos conciertos vien xente de 20 años y, con ‘Golpe de tacón’, cantar que fala de la Fuelgona del 62, veníen a preguntanos que quién yera Anita, Anita Sirgo, una de les sos cabezaleres. Y eso dionos de pensar. Son xente que va a los nuesos conciertos, que bailla los nuestros temes, que-y gusta Dixebra, pero que tienen 20 años y naide-yos esplicó, naide-yos dixo qué foi, qué representó la Fuelga del 62 y quién ye Anita Sirgo. Y d’esti tipu d’esperiencies vien esti trabayu discográficu y bibliográficu en definitiva”.

No musical apuntó que “sigue la llinia de Dixebra. En 20 temes hai pieces d’aire funky, folk, funk, rock, ska, reggae… Esi mecigayu estilísticu que tenemos en Dixebra”. Tamién rescampló les collaboraciones instrumentales de Javi y José Manuel Tejedor, Rubén Bada y Toño Gómez, amás de les voces femenines de Sandra Lusquiños (Alexandra In Grey), Lluci Palomares (Corquiéu) y Bárbara González-Quevedo (Alienda).

Nesi puntu quixo recordar que “nes canciones del discu hai muncha presencia femenina”. Asina, citó “les muyeres que sufrieron la represión depués de la Guerra Civil” o “les lluches que protagonizaron otres muyeres como les trabayadores d’Ike, llucha sostenida nel tiempu exemplu nos años 90”.

El llibru

Completa y complementa la parte musical un llibru, del qu’esplicó qu’abre con un testu del guitarrista Primi Abella “que fala del procesu qu’él escomenzó nel pueblu d’onde ye orixinariu él, Chanos, nel conceyu de Ḷḷena”. De “cómo foi y el porqué d’esti momentu d’un trabayu como ésti, esbillando cada cantar y va falando de caún d’ellos”.

Llueu sigue una “estaferia na que collaboren historiadores, escritores, periodistes, profesores...”. Marta Mori, Rubén Vega, Faustino Zapico, Irene Faza, Xosé Miguel Suárez Fernández, Penélope Miranda y Rafa R. Valdés participen nesta segunda parte del llibru, que se completa con un testu de Pablo Texón al entamu y otru final de Xune Elipe, entituláu ‘Cantares con historia’ nel que “faigo ver la importancia qu’en toes estes lluches de les que falén enantes tuvo la música nelles; cómo la música tamién tuvo presente nes distintes lluches que llevaron alantre históricamente les clases populares asturianes”.

La parte gráfica garra tamién importancia nesti trabayu. Asina, inclúi 22 ilustraciones esclusives de dibuxantes como Miguel Solís Santos, Ruma Barbero, Alfonso Zapico, Nieves González ‘Nievesita’ “que-y dan un valir extra al trabayu” y semeyes cedíes pol Muséu del Pueblu d’Asturies. “Tamos mui contentos del resultáu final, tanto de la parte musical como de la temática de los testos lliterarios, como del productu en sí. Pensamos que ye un productu de luxu, qu’una banda como Dixebra que cumple 35 años merecía un productu como ésti”, finó Elipe.

Presentación nel Día de les Lletres Asturianes

El conciertu de presentación de ‘Ente la niebla’ va tener llugar el vienres viniente, XLIII Día de les Lletres Asturianes, na uvieína Sala Tribeca. “Ye un día mui simbólicu pa remembrar que siguimos na llucha, que les clases populares asturianes tienen una llucha pendiente que ye la reconocencia de los derechos llingüísticos y que nos vamos siguir aportanto’l nuesu granín d’arena pa que se reconoza la oficialidá de les llingües propies d’Asturies”.

L’actuación va principiar a les 20.30 hores y les entraes yá tán a la venta a 12 euros de manera anticipada en L'Esperteyu (Uviéu), Trisquel (Xixón) y El Cafetón (Avilés). Na puerta van tener un preciu de 15.

Na semeya, Elipe na presentación de 'Ente la niebla' celebrada na sala de prensa de la Sociedad General de Autores y Editores (SGAE).