“Ye mui importante qu’Asturies s'asitie nesti festival”, asegura Barbón

|
“Ye mui importante qu’Asturies s'asitie nesti festival”, asegura Barbón

El Festival Interceltique de Lorient avanza nel Année des Asturies con ésitu de públicu y un gran ambiente. Una atmósfera especial que pudo descubrir el presidente Adrián Barbón, qu'avanzada la xornada aseguraba que “ye mui importante qu'Asturies s'asitie nesti festival".

Yera un día históricu'l d'ayeri pa la delegación asturiana nel Interceltique. Miembru de pleno derechu del certame bretón dende’l 1987, nunca hasta agora un presidente acudiera a An Oriant en visita institucional; nin siquiera un conseyeru de Cultura a conocer de primer mano'l potencial d’un festival que mueve a 800.000 persones de munches procedencies tolos años.

Esta edición, dedicada a Asturies, la postura del Gobiernu camudó. Dende’l sábadu Berta Piñán, responsable de Cultura, Política Llingüística y Turismu, ta presente nel festival y ayeri aportó Barbón, con una apretada axenda que principió con una visita al alcalde Fabrice Loher. Llueu un paséu pela esposición  ‘Llabor’ del llavianés Ricardo Villoria, una parada nel pabellón d'Asturies xunto col primer edil y, yá de tarde, un actu de sofitu a la candidatura 'Cultura Sidrera Asturiana’ xunto colos alcaldes de la Mancomunidá de la Sidra lideraos pol de Bimenes, Aitor García Corte, onde atendió a Asturies.com.

“Un día importante. Yo quería tar equí, nesta ocasión, añu d'Asturies, xunto cola conseyera”, rescampló'l presidente. Un apoyu a la delegación asturiana d’un festival "pel que pasen 800.000 persones y que cuenta con un desfile  nel que los asturianos participaron los primeros, cola nuesa bandera ondiando, siguíu per televisión por dos millones de franceses”.

Tamién recordó que “en tola cartelería sal Asturies per toles partes, nos manteles, nos vasos col que se bebe... Ta faciéndose publicidá d'Asturies. Esto pue abrinos puertes a que nos conoza mucha xente pa los que güei somos mui desconocíos. Y pal Gobiernu d’Asturies que trabaya muncho por esa espansión turística pa que nos conoza más internacionalmente esti festival ye oxetivu clave”.

Entrugáu pola falta d’un mayor apoyu institucional a la delegación y una apuesta pol papel d’Asturies nel festival, respondió que “nun lo sé, sinceramente, pero he reconocer que nel 2019 foime imposible porque yera recién llegáu, llueu la pandemia cambiólo too... Pero cuando Lisardo Lombardía y Iñaki Santianes, a los que tantos-yos debemos n’Asturies por difusión y conocimientu, plantegaron en presidencia que-yos gustaría que viniera, dende llueu dixi que sí incondicionalmnete, porque ésti ye un escaparate onde ahí muncha historia común, vese que somos pueblos d’orixe históricu celta, amás dedicáu a Asturies”.

Tamién citó “les munches posibilidades económiques, non sólo turístiques, y yo dende llueu, como presidente, vio dar tol apoyu a la delegación asturiana”, formada nesta ocasión por 250 persones. “Ye mui importante qu’Asturies s’asitie equí. Desconozo por qué otros presidentes nun lo fixeron, pero yo lo faigo pensando n’Asturies, lo que ye meyor p’Asturies”, aseguró.

Por último, rescampló “el ciñu” que se ve n’An Oriant “a la xente d’Asturies, que xeneramos, y sobre manera la emoción cola que nos descubren”. “Equí ahí un filón económicu de primer nivel”, finalizó.

La visita de Barbón finó con un alcuentru cola Banda Gaites Llacín y col Grupo Folklóriko Trebeyu y una visita guiada pol vicepresidente del festival, Fanch Oyaux, pa conocer el funcionamientu internu del espectáculo ‘Horizons Celtiques’, al qu’asistió. Por último, acudió al pabellón d’Asturies a disfrutar del bon ambiente.

Contador Estadistiques