Yá ta a la venta'l discu de La Bandina'l Tombo

Anque'l discu yá se presentó va unes selmanes, nun foi hasta selmana cuando se punxo'l cd definitivamente a la venta, tamién na nuestra tienda na rede Asturshop.com yá ta disponible esti discu.

Yá col cd nes manes nun queda nenguna dulda de qu'esti ye ún de los discos del añu, tantu pola calidá de la grabación, como pol discursu musical defendíu nos quince cantares del discu. "La Bandina'l Tombo" nun cambió d'estilu por mor de grabar, melodíes tradicionales más o menos antigües interprétenles d'un xeitu amañosu d'escuchar, ensin complicaciones que puedan adornar innecesariamente los cantares. Un soníu compactu y de calidá que se mueve con facilidá pelos distintos estilos de la música pal baille n'Asturies que repasa'l discu.


Esti discu representa pa esta bandina'l frutu d'un trabayu de muncho tiempu, llevao con paciencia y coherencia. Dende que nacieron en 2001 son incontables les fiestes, mercaos o nueches folk onde los músicos fueron creando esi soníu inconfundible de Tombo-folk. La bandina tien claro que "ñació cola intención de recuperar l'espíritu de los bailles que se facíen n'Asturies a la fin del sieglu XIX y a primeros del XX." Y por ello'l so repertoriu ta formáu por "por pieces a lo suelto (como la xota, el saltón, la muñeira, la xirandiya...) y poles nueves pieces a lo agarrao (la polca, el valse, la mazurca, el pasudoble...). Ye una música pensao pa baillar y pasalo bien" . El cd sal a la cai col sellu creáu polos componentes de "Felpeyu" Ígor Medio y Carlos Redondo, "Tierra Discos". Grabóse nel estudiu La Factoría, en Piedras Blancas, el diseñu ye d'Antón Barquero y La Bandina'l Tombo, y el grabáu de la portada ye de Xosé Antón Fernández "Ambás". Les igües de toles pieces y producción executiva y artística ye de la propia "Bandina'l Tombo".


"La Bandina'l Tombo" ta formada por Carlos Tejerina "Chiri": contrabaxu, Dolfu R. Fernández: vigulín y turullu, Marga Lorences: curdión y pies, Pepín de Muñalén: flauta, cuyares y bombu. Pero pa esti discu nun tuvieron solos, y p'algamar el bon resultáu final echo-yos un gabitu unos cuantos amigos, Xosé A. Fernández "Ambás" a la voz, Xaime Arias al piano, Diego Pangua y Borja Baragaño a la xiblata, Xurde Fernández al vigulín y mandolina, Manuel Cordero al redoblante, Daniel Lombas al bombu y fierros, Lorena G. Caro al clarinete, Juan Piedra a la trompeta y Alfonso Mollá a la tuba, ente otros.

El discu yá se puede mercar na nuestra tienda n'internet, pero amás n'Asturies.com ufiertamos la posibilidá de sentir ún de los cantares del discu , namás qu'hai que calcar equí pa sentir el primer corte d'esti discu de "La Bandina'l Tombo".