Yá tán a la venta les entraes pal Conciertu pola Oficialidá

Yá tan a la venta les entraes pal conciertu pola oficialidá que tolos años organiza la Xunta Pola Defensa de la Llingua Asturiana y que va tener llugar el próximu sábadu 29 d'abril nel Campus d'Humanidaes d'Uviéu. Asturies.com ye ún de los medios collaboradores con esti acontecimientu


Al preciu de cuatro euros, les entraes tán a la venta anticipada n'Uviéu nos chigres "La Casa Posafuelles", "Isla de Cuba" y nel "Chigre la Deva". N'Avilés alcuéntrense nel Cafetón, mientres qu'en Xixón los puntos de venta son los locales "El trisquel" "El Baruku" y el local social "Sestaferia". En Candás el chigre "La Gueta", en Grau "L'ablugo" en Salas el "Bar Abel" en Tinéu "Mesón Cervantes" en Cangas del Narcea'l chigre "El moreno", na Puela Allande'l "Café Centro" en Mieres "La Buraka", la cervecería "La Xarrina" na Pola L.lena, el Llar de Keko en La Felguera, "El Riscar" en Llaviana, el local "Reciella Mallory" de L'Entregu, "El Diañu" en La Pola Siero y "La Posta" en Nava.

En cuantes al conciertu, dientro de la carpa asitiada p'abellugar al públicu de la posible lluvia, amás de dos escenarios esteriores cola so propia cubrición, van poder sentise ocho grupos casi de siguío. Per un llau van tocar Skama la Rede, Dixebra, OI N'AST! y Toli Morilla, mientres que con un corte más folk van tar Corquiéu, DRD y la Col.lá Propinde, amás del hip-hop n'asturianu del grupu K-Nalón, formáu pol cantante Tori y por Ceeris, autor de les bases rítmiques.