El XXVII Conciertu pola Oficialidá adelanta la fecha poles eleiciones y pasa a celebrase en sala

|

La importancia de les eleiciones de mayu lleva a la Xunta pola Defensa de la Llingua Asturiana (XDLA) a adelantar la fecha del XXVII Conciertu pola Oficialidá, que va celebrase’l 2 de mayu. Les otres novedaes d’esta edición son el pasu de les actuaciones a una sala, en concretu la xixonesa Acalpulco, y la grabación de los conciertos pa la edición d’un CD.

“Teníemos la previsión de caltener la fecha de xunu y la esplanada del Acuariu como sede, pero dada la situación que tamos observando con respeuto a la oficialidá decidimos adelantala al día 2 de mayu como previa de la manifestación por mor del Día de les Lletres Asturianes y del entamu de la campaña eleutoral”, esplica Carlos Pulgar, voceru nacional de la XDLA. El pocu tiempu de reaición que tuvo’l coleutivu llevólu a apostar pola celebración del conciertu nuna sala, l’Acapulco, lo que va trayer delles modificaciones con respeuto al formatu habitual, anque la intención de la organización ye qu’éstes sían mínimes. “Vamos xestionar tola sala y caltener les barres colos nuesos precios”, apunta Pulgar, que sí reconoz que va haber una gran ausente: la sidra. Pa tapar esi güecu, la XDLA va contar con una edición de Caleya especial pa esta cita.

Onde nun va haber cambios va ser nes más d’ocho hores de música previstes con grupos de folk, rap, rock, ska y un DJ, que van anunciase nes selmanes próximes. Pa la escoyeta del cartelu, la XDLA apostó por aquelles bandes que cuenten con un soníu más potente pa sala, cola intención de grabar toles actuaciones pa sacar un CD especial con una esbilla de cantares de cada formación. L’Acapulco, perteneciente al Casinu d’Asturies, cuenta con un aforu de más de 700 persones, polo que la organización nun espera problemes nesi sen por mor de la circulación de públicu habitual nesta celebración.

Na semeya, un momentu de la edición del 2014. Imaxe propiedá de la XDLA.

Contador Estadistiques