XX Aniversariu de la Noite Celta de Porcía

La decana de les nueches folk n'Asturies cumple venti años el
próximu 30 d'agostu.



La Noite Folk de Porcía ye un casu curiosu ente la riestra de
festivales folk d'Asturies. Magar que tuvieron munchos problemes en venti
años pa poder caltener esti conciertu, l'asociación cultural
Alameda nun se rindió y algamó facer d'esta nueche una de les
más esperaes pol aficionao folk asturiano. Esti añu quieren
celebrar el so cumpleaños como merez, con bonos grupos y folixa
asegurada.



El domingu 31 na isla fluvial de Porcía, llugar onde se celebra'l
conciertu vamos poder ver a la banda de gaites
"La Reina del
Truébano", acabantes de sacar discu, y al grupu de baille
"El Cabazo". Estes son dos agrupaciones del occidente asturianu que
van calecer l'ambiente primero de la llegada de los grupos de folk.



La selección d'esti añu cuenta con dos de los grupos
más importante de la escena folk asturiana, como son "Llan de
Cubel" y "Felpeyu", amás d'otru grupu que completa'l
cartel que ye "Brenga Astur". Tantu "Llan de Cubel" como
"Felpeyu" son dos grupos que tienen un gran cariñu a esta
noite, y de xuro que pa ellos esta va ser un conciertu mui especial nesti venti
aniversariu de la güela de les nueches folk n'Asturies.



Pa dir a esta fiesta de cumpleaños namás tenéis
qu'averavos al conceyu del Franco nel occidente d'Asturies el sábadu 30
d'agostu, y esfrutar de la música y del espaciu onde se desenvuelve esa
música, una isla fluvial a la vera de la mar.