Xuristes pol Asturianu alvierte al Rei que la so presencia n’Asturies pue vese como un “aval” a un modelu educativu que nun respeta l’asturianu

Con motivu de la visita del Rei d'España a Asturies, onde va participar güei na inauguración del cursu académicu, la organización "Xuristes pol asturianu" de la que ye parte'l lletráu de la Xunta Xeneral Xurde Blanco, que vive un enfrentamientu llegal cola alministración asturiana pol derechu a espresase n'asturianu nes sos comunicaciones cola mesma, unvió'l pasáu 10 de setiembre una carta al Rei pa ponelu al corriente de la situación llegal del asturianu en comparación coles demás llingües del estáu.

La carta recuerda, ente otres cuestiones, como "nel inxerimientu dientro del sistema educativu l'asturianu nun recibió del Estáu la proteición que-yos dio al catalán, gallegu, valencianu y vascu" y llamenta como los políticos asturianos "avecen a enchipase públicamente pela parte que-yos tocó nel diseñu y xestión d'un modelu educativu estremáu del que rixe nes demás comunidaes autónomes billingües y qu'incumple tolos separtaos del artículu 8 de la Carta Europea de les Llingües Rexonales o Minoritaries"

Como conclusión de les sos reflexones, dende Xuristes pol Asturianu llamenten que "l'aceptación del convide que se-y fizo al Xefe del Estáu pa presidir la inauguración del añu escolar 2007-2008 na Comunidá del Principáu d'Asturies, pudiere interpretase o emplegase como un aval a un modelu eductivu escepcional n'España, contrariu al testu y finalidá de los trataos y recomendaciones internacionales na materia ya impuestu por determinaes personalidaes polítiques estatales y rexonales".

Dende Xuristes pol Asturianu comenten que nun hebo entovía rempuesta a la carta "quitando que lo seya la retirada, por mandáu del Xefe de Protocolu de la Casa real, de la bandera de la Comunidá Europea de la sede de la Universidá d'Uviéu, fechu perabegosu pa los ciudadanos que mos sentimos, arriendes d'asturianos y asturianistes, fondamente europeos y europeístes".