Xuntanza de mocedá y tradición en Llaviana

Charres, cursos, nueche folk y un concursu de gaiteros son un exemplu de la riestra d'actividaes de la iniciativa "La Xuntanza de la mocedá y la tradición", que dende esti vienres va desenvolvése en Llaviana.

Dende esti vienres diecisiete hasta'l sábadu venticinco Llaviana va echa-y una güeyada a dellos aspectos de la tradición asturiana, col oxetivu d'averar a la mocedá a estes espresiones de la cultura d'Asturies. Esta "Xuntanza de la mocedá y la tradición" ta organizada pol Conceyu de Llaviana al traviés de la Oficina d'Información Xuvenil, l'Asociación Cultural "Yesca" y les Mocedaes Socialistes de Llaviana. Ente les actividaes va haber un esposición de mitoloxía asturiana, cursos de baille asturiano, delles charres, un concursu de gaiteros y p'acabar una nueche folk. El concursu de gaiteros ye pal día venticinco, y el plazu p'apuntáse fina'l ventitrés de setiembre. Ye un concursu pa gaiteros mozos colo que pa poder participar nun se debe superar los 21 años, y hai qu'interpretar dos pieces, una obligatoria "El Xiringüelu de Remis", y otra de llibre elección que perteneza a la tradición asturiana. Na web de l'asociación "Yesca" pue consultáse les bases del concursu. La nueche folk va xuntar música y teatru, a les 22:00 de la nueche'l grupu de teatru "Nun Tris" va facer la obra "Brenga", pa que darréu, a eso de les 00:00 de la nueche actuen los grupos de folk. La música folk van ponela "Gatos del Fornu", el grupu carbayón lideráu pol gaiteru Guillermo Pérez, y "Deua Dubra" que van presentar el primer discu cola discográfica Fonoastur "Soyáu de Mardana".

Pa consultar la programación completa, y los sos horarios, ponemos a disposición de los nuesos llectores el programa completu nesti enllace.