Xunta Moza entama esti sábadu un ‘Preconciertu pola Oficialidá’

Alfredo González, La Curuxa y I.R.A. conformen el cartelu del conciertu previu a la ‘Oficialidá’ qu’entama la Xunta Moza esti sábadu nel CSOA La Madreña. La cita grande va tener llugar el 8 de xunu nel xixonés Parque de los Hermanos Castro.

Con esta celebración, Xunta Moza y la Xunta pola Defensa de la Llingua Asturiana (XDLA) pretenden anunciar el XXV Conciertu pola Oficialidá y, al mesmu tiempu, buscar financiación pa la gran cita de xunu. Asina, la entrada pal ‘Preconciertu pola Oficialidá’ ye de 3 euros. El primer artista en xubir al escenariu de La Madreña va ser el cantautor Alfredo González –alredor de les 19.30 hores–, pa depués dar pasu a la música tradicional de La Curuxa y, por último, al hardcore d’I.R.A. Un cartelu pa tolos gustos pa una nueche enfocada a la folixa y, tamién, a la reivindicación llingüística.

“Dende Xunta Moza, asociación que llucha polos derechos de los asturianofalantes, anímase a tol mundu a la participación nesti actu, así como nel restu d’actividaes que se proponen dende los diferentes colectivos de reivindicación llingüística pa poder algamar la dignidá y el estatus social y políticu que la llingua asturiana merez”, afirma esti coleutivu que yá trabaya na organización del XXV Conciertu pola Oficialidá. La fecha definitiva ye’l sábadu 8 de xunu, y el llugar, el mesmu del añu pasáu, esto ye, el xixonés Parque Inglés, agora nomáu de manera oficial como Parque de los Hermanos Castro, n’homenaxe a los sportinguistes Quini y Jesús Castro.