Xunetu fina con menos de 60.000 persones en paru n'Asturies

Ye la cifra más baxa dende payares del 2008.

Asturies enllaza seis meses de descensu del paru y baxa de los 60.000 desemplegaos en xunetu. En total rexistráronse 1.464 demandantes de trabayu menos qu'en xunu, un descensu del 2,43 por cientu que pon el total en 58.706.

Trátase de la segunda mayor baxada relativa, namái superada por Cantabria con un 2,52 por cientu, y la tercera, más lloñe, ye la Comunitat Valenciana, con un 0,84. La media estatal quedó nun aumentu del 0,11 por cientu al sumar 3.230 paraos que ponen el total en 2.883.812, presentando los peores datos Ceuta, con un 3,59 por cientu; La Rioja, con un 2,60; y Illes Balears, con un 2,21.

El país encadena tamién seis meses siguíos de creación de puestos de trabayu al ganar 3.783 afiliaos a la Seguridá Social. Asina, la ocupación medró'l mes pasáu el 1,01 por cientu hasta asitiase en 378.645 persones, el meyor datu rexistráu dende setiembre del 2011

Asturies preséntase d'igual forma como la segunda con meyor evolución del emplegu y amuesa un comportamiento más favoratible que la media estatal, dao que la ocupación menguó en xunetu n'España'l 0,04 por cientu. Dende febreru creáronse 11.016 puestos de trabayu nel país.

9,91 por cientu interañal

En comparanza a esti mesmu mes del añu pasáu, el paru baxó n'Asturies en 6.459 persones –van 16 meses siguíos de descensu interañal–, un 9,91 por cientu, inferior a la media estatal, que foi del 15,59 por cientu al contar con 532.686 desemplegaos menos. Les meyores cifres son les d'Illes Balears (33,74 por cientu), la Comunidad de Madrid (25,36 por cientu) y Canarias (24,66) y les más baxes Euskadi (6,72) y Galicia (7,95), con Melilla como únicu llugar onde medró la demanda de trabayu, un 3,86 por cientu.