Xune Elipe fai un llamáu p’acabar col usu diglósicu del asturianu tres recoyer El Pegollu de la XDLA

“Toi un pocu fartu de que persones como músicos, escritores, políticos…, usen l’asturianu en público namái pa falar de madreñes y horros”, dixo Xune Elipe nel actu d’entrega de los Premios Andrés Solar. Dixebra y Trabe recibieron El Pegollu.

El grupu de música avilesín y la editorial uviedina protagonizaron la tarde del sábadu esti eventu añal col que la Xunta pola Defensa de la Llingua Asturiana (XDLA) pretende premiar a la persona o entidá que destacara a lo llargu del añu pola so defensa y promoción del idioma y, al empar, recordar la figura del escritor xixonés Andrés Solar. Nesta vixésimooctava edición de los gallardones, El Pegollu, la parte positiva de los premios, foi compartíu por dos “proyeutos fundamentales pa entender el desarrollu cultural, social y económicu de la llingua asturiana nes últimes décades” y pol “so apueste decidíu pola música y lliteratura a lo llargo de bien d'años, demostrando que l’asturianu ye una ferramienta útil y necesaria nel rellatu de la contemporaneidá d'Asturies”. Mentes, la parte negativa, El Madreñazu, destinóse pa los recortes en materia llingüística y pa la ‘Llei Wert.

Naciu Varillas foi l’encargáu de presentar l’eventu nun salón d’actos del Centru de Cultura Antiguu Institutu con poques silles vacíes y con Lali y Jesús ente’l públicu en representación de la familia Solar. Tres la llectura de les actes del xuráu por parte de Miguel Rodríguez Monteavaro, los integrantes de Dixebra Xune Elipe y Llorián García –el más vieyu y el más mozu del grupu– y los responsables d’Ediciones Trabe, Esther Prieto y Samuel Castro subieron a recoyer El Pegollu. El primeru en tomar la pallabra foi’l cantante de la banda avilesina, qu’amosó la so satisfaición y la de tolos miembros del grupu por recibir un premiu “concedíu polos mios iguales; polos reivindicadores de la llingua d’Asturies”, que lleva’l nome d’Andrés Solar, “un home que me dexó marca” pese a coincidir nunos pocos conceyos cuando dambos militaben nel Ensame Nacionalista Astur. Na so intervención, Elipe fixo un llamáu p’acabar col usu diglósicu del asturianu y aseguro tar “un pocu fartu de que persones como músicos, escritores, políticos…, usen l’asturianu en público namái pa falar d’horros y madreñes”. Por último, destacó que, pese a que nun paren de recorda-y los 25 años de Dixebra, al grupu tovía-y queden “munches ganes”, con discu nuevu en previsión pal añu qu’entra.

Pela so parte, Prieto señaló que recibir El Pegollu “ye un honor pa nós” y recordó la trayeutoria d’una editorial que garró esti añu con Castro como sociu, pero que nació hai 20 años de la mano d’Antón García. “Foi la primer editorial n’asturianu con vocación de profesionalidá”, destacó, pa depués facer referencia a los 700 títulos espublizaos nesti tiempu, más de 600 en llingua asturiana. Pese a la crisis de la venta de llibros y el recorte nes subvenciones a la producción editorial, la responsable de Trabe afirmó que mantienen “ilusión” nel proyeutu nel que tán embarcaos y que, pese a la necesidá de diversificación de la editorial, espublizando anguaño tamién en castellanu, l’enfotu de la empresa ye “siguir al serviciu de la cultura, la sociedá y la llingua asturiana”. Mentes, Castro centróse nos agradecimientos y apuntó que’l gallardón da “moral” pa enfrentase al futuru.

Apoyu a l’actividá creativa

Tres la entrega de los gallardones, Carlos Pulgar, voceru de la XDLA fixo la llectura del discursu añal con motivu de los Premios Andrés Solar. Nel mesmu, el representante del coleutivu cívicu repasó un añu nel que “la pérdiga y afogamientu de dalgunes de les más importantes actividaes mediátiques y de los espacios d’intercambiu y distribución de les producciones culturales ta llevando a un retroceso na visibilidá del idioma y de les sos posibilidaes creatives”. Sicasí, destacó “la vitalidá de la creación n’asturianu” y la disponibilidá de la Xunta “pa facer de ponte ente la xente y les manifestaciones culturales del asturianu”.

“La prorroga presupuestaria d'anguaño foi amestando un recorte enriba d'otru, favoreciendo la desapaición de medios de comunicación y la cuasi eliminación de les actividaes musicales entamaes nos conceyos y les axendes culturales. El mercáu, los establecimientos, les empreses y les persones que tán detrás del mundu cultural asturianu tán sufriendo la mesma sangría continuada como bien d'otros sectores fundamentales pa caltener una sociedá xusta y cohesionada”, continuó pa introducir la concesión d’El Madreñazu a los recortes en materia llingüística y a la Llei Wert. “L'Alministración que tenemos sigue ensin poner el más mínimu interés en conocer les necesidaes reales d'editores, productores y creadores, siguen ensin adaptar y modular les ayudes a les verdaderes necesidaes de la nuestra producción cultural y siguen ensin facer el más mínimu esfuerzu na promoción y difusión de les obres”, denunció Pulgar, ensin escaecer la situación llaceriosa que vive l’asturianu nel sistema educativu.

Darréu, el voceru de la XDLA emponderó la trayeutoria de Trabe y de Dixebra, pa depués facer “un llamáu optimista a la implicación y al compromisu cola nuesa llingua”. Asina, pese a la “muerte lenta” qu’escoyeror los gobiernos del país pal idioma, “la nuestra respuesta nun va ser mirar pa otru llau; nin baxar los brazos; nin echar la culpa a los que sufren la situación; nin apuntanos al posturéu neocon”; sinón “la defensa apasionada de la llingua; la de predicar col exemplu; la de comprometese cola educación y la tresmisión del idioma a los nuestros fíos; la de falar a la xente y los medios de y na nuestra llingua; la d’apoyar la creación cultural n’asturianu…”. Esto ye, “continuar na llucha, porque sabemos de la urxencia, del peligru y de les necesidaes. El nuestru idioma manda un SOS”.

Pa zarrar l’actu, Dani Stylo fixo una remezcla de cantares históricos de Dixebra, ente los que se pudieron sentir ‘Vieyu combatiente’, ‘Kuenka Chunga’, ‘Grie-ska’ y la melodía de gaita qu’utiliza la banda avilesina en ‘Pallabres vieyes’ –cantar que musicaliza un poema d’Andrés Solar–, amás de ‘Tienes un fusil’, de Soncai System.

Na semeya, García, Castro, Prieto, Elipe y Lali Solar.